Read La Sankta Biblio esparanto Psalmo 132 Bible Online

Psalmo 132 - La Sankta Biblio esparanto bible

Psalmo 132

¹Kanto de suprenirado. Rememoru, ho Eternulo, Davidon kaj ĉiujn liajn suferojn;

²Ke li ĵuris al la Eternulo, Kaj donis sanktan promeson al la Potenculo de Jakob:

³Mi ne eniros en la ŝirmejon de mia domo, Mi ne supreniros sur la liton, pretigitan por mi;

⁴Mi ne donos dormon al miaj okuloj, Nek dormeton al miaj palpebroj,

⁵Ĝis mi trovos lokon por la Eternulo, Loĝejon por la Potenculo de Jakob.

⁶Jen ni aŭdis, ke ĝi estas en Efrata; Ni ĝin trovis sur arbara kampo.

⁷Ni iru en Lian loĝejon, Ni kliniĝu antaŭ la benketo de Liaj piedoj.

⁸Leviĝu, ho Eternulo, en Vian ripozejon, Vi kaj la kesto de Via potenco.

⁹Viaj pastroj vestiĝu per justeco, Kaj Viaj fideluloj triumfu.

¹⁰Pro David, Via sklavo, Ne forturnu la vizaĝon de Via sanktoleito.

¹¹La Eternulo ĵuris al David veron, kaj Li ne dekliniĝos de ĝi: Frukton de via ventro Mi sidigos sur via trono;

¹²Se viaj filoj observos Mian interligon kaj Mian leĝon, kiun Mi instruos al ili, Tiam ankaŭ iliaj filoj eterne sidos sur via trono.

¹³Ĉar la Eternulo elektis Cionon, Kaj deziris, ke ĝi estu loĝejo por Li:

¹⁴Ĉi tio estas Mia ripozejo por eterne; Ĉi tie Mi loĝos, ĉar ĝin Mi ekdeziris.

¹⁵Ĝian nutraĵon Mi abunde benos, Ĝiajn malriĉulojn Mi satigos per pano.

¹⁶Kaj ĝiajn pastrojn Mi vestos per savo; Kaj ĝiaj fideluloj ĝojos kaj triumfos.

¹⁷Tie Mi elkreskigos kornon al David, Tie Mi aranĝos lumilon por Mia sanktoleito.

¹⁸Liajn malamikojn Mi kovros per honto; Sed sur li brilos lia krono.