Read La Sankta Biblio esparanto Psalmo 135 Bible Online

Psalmo 135 - La Sankta Biblio esparanto bible

Psalmo 135

¹Haleluja! Gloru la nomon de la Eternulo, Gloru, sklavoj de la Eternulo,

²Kiuj staras en la domo de la Eternulo, En la kortoj de la domo de nia Dio.

³Gloru la Eternulon, ĉar la Eternulo estas bona; Prikantu Lian nomon, ĉar ĝi estas ĉarma.

⁴Ĉar Jakobon la Eternulo elektis al Si, Izraelon kiel Sian trezoron.

⁵Ĉar mi scias, ke la Eternulo estas granda Kaj ke nia Sinjoro estas super ĉiuj dioj.

⁶Ĉion, kion la Eternulo deziras, Li faras, En la ĉielo kaj sur la tero, sur la maroj kaj en ĉiuj abismoj.

⁷Li levas la nubojn de la randoj de la tero, Li aperigas fulmojn en la pluvo, Li elirigas la venton el Siaj provizejoj.

⁸Li batis la unuenaskitojn en Egiptujo, De homo ĝis bruto.

⁹Li aperigis signojn kaj miraklojn interne de vi, ho Egiptujo, Super Faraono kaj ĉiuj liaj sklavoj.

¹⁰Li batis multajn popolojn, Kaj mortigis potencajn reĝojn:

¹¹Siĥonon, reĝon de la Amoridoj, Kaj Ogon, reĝon de Baŝan, Kaj ĉiujn regnojn Kanaanajn.

¹²Kaj Li donis ilian landon kiel heredon, Heredon al Lia popolo Izrael.

¹³Ho Eternulo, Via nomo estas eterna; Ho Eternulo, la memoro pri Vi restas por ĉiuj generacioj.

¹⁴Ĉar la Eternulo juĝos Sian popolon, Kaj Li korfavoros Siajn sklavojn.

¹⁵La idoloj de la popoloj estas arĝento kaj oro, Faritaĵo de homaj manoj.

¹⁶Buŝon ili havas, sed ne parolas; Okulojn ili havas, sed ne vidas;

¹⁷Orelojn ili havas, sed ne aŭdas; Kaj ne ekzistas spiro en ilia buŝo.

¹⁸Kiel ili, tiel estos iliaj farantoj, Ĉiuj, kiuj ilin fidas.

¹⁹Ho domo de Izrael, benu la Eternulon; Ho domo de Aaron, benu la Eternulon;

²⁰Ho domo de Levi, benu la Eternulon; Ho timantoj de la Eternulo, benu la Eternulon.

²¹El Cion estu benata la Eternulo, Kiu loĝas en Jerusalem. Haleluja!