Read La Sankta Biblio esparanto Psalmo 139 Bible Online

Psalmo 139 - La Sankta Biblio esparanto bible

Psalmo 139

¹Al la ĥorestro. Psalmo de David. Ho Eternulo, Vi min esploras kaj min konas.

²Vi scias, kiam mi sidas kaj kiam mi leviĝas; Vi komprenas mian penson de malproksime.

³Kiam mi iras kaj kiam mi ripozas, Vi estas ĉirkaŭ mi, Kaj ĉiujn miajn vojojn Vi konas.

⁴Ĉar antaŭ ol troviĝas vorto sur mia lango, Jen, ho Eternulo, Vi ĉion jam scias.

⁵De malantaŭe kaj de antaŭe Vi ĉirkaŭbaris min Kaj metis sur min Vian manon.

⁶Mirinda estas por mi tia sciado, tro alta; Mi ĝin ne povas kompreni.

⁷Kien mi iros for de Via spirito? Kaj kien mi kuros for de Via vizaĝo?

⁸Se mi leviĝos al la ĉielo, Vi estas tie; Se mi kuŝiĝos en Ŝeol, jen Vi tie estas.

⁹Ĉu mi okupos la flugilojn de la matenruĝo, Ĉu mi loĝiĝos sur la rando de la maro:

¹⁰Ankaŭ tie Via mano min kondukos, Kaj Via dekstra mano min tenos.

¹¹Se mi diros: Mallumo min kovros, Kaj la lumo ĉirkaŭ mi fariĝos nokto:

¹²Eĉ mallumo ne mallumas antaŭ Vi, Kaj la nokto lumas kiel tago; Mallumo fariĝas kiel lumo.

¹³Ĉar Vi kreis mian internaĵon, Formis min en la ventro de mia patrino.

¹⁴Mi gloras Vin, ĉar mi estas mirinde kreita; Mirindaj estas Viaj kreitaĵoj, Kaj mia animo tion bone konscias.

¹⁵Ne estis kaŝitaj antaŭ Vi miaj ostoj, Kiam mi estis kreata en kaŝiteco, Kiam mi estis formata en la profundo de la tero.

¹⁶Mian embrion vidis Viaj okuloj, Kaj en Via libro estis enskribitaj ĉiuj tagoj destinitaj, Kiam ankoraŭ eĉ unu ne ekzistis.

¹⁷Kiel grandvaloraj estas por mi Viaj pensoj, ho Dio! Kiel granda estas ilia nombro!

¹⁸Se mi ilin kalkulus, ili estus pli multaj ol la sablo; Kiam mi vekiĝas, mi estas ankoraŭ kun Vi.

¹⁹Mortigu, ho Dio, la malvirtulojn, Kaj sangaviduloj foriĝu de mi!

²⁰Ili parolas pri Vi malice, Kaj Viaj malamikoj leviĝas por trompo.

²¹Viajn malamantojn, ho Eternulo, mi ja malamas, Kaj Viajn kontraŭulojn mi abomenas.

²²Per ekstrema malamo mi ilin malamas; Ili fariĝis por mi malamikoj.

²³Esploru min, ho Dio, kaj konu mian koron; Provu min kaj sciu miajn pensojn.

²⁴Kaj rigardu, ĉu mi estas sur malbona vojo, Kaj gvidu min sur la vojo de eterneco.