Read La Sankta Biblio esparanto Psalmo 16 Bible Online

Psalmo 16 - La Sankta Biblio esparanto bible

Psalmo 16

¹Verko de David. Gardu min, ho Dio, ĉar mi rifuĝas ĉe Vi.

²Mi diris al la Eternulo: Vi estas mia Sinjoro; Mi ne havas alian bonon krom Vi.

³Al la sanktuloj, kiuj estas sur la tero, Kaj al la majestuloj iras mia tuta deziro.

⁴Multiĝos la malĝojoj de tiuj, kiuj sekvis alian; Mi ne verŝos iliajn sangajn verŝoferojn Kaj ne metos iliajn nomojn en mian buŝon.

⁵La Eternulo estas mia sorta parto kaj kaliko; Vi subtenas mian sorton.

⁶Loto agrabla trafis min, Ĉarma estas mia heredo.

⁷Mi gloras la Eternulon, kiu konsilas min; Eĉ en la nokto instruas min mia internaĵo.

⁸Ĉiam mi vidas la Eternulon antaŭ mi; Ĉar Li estas ĉe mia dekstra mano, mi ne falos.

⁹Tial ĝojas mia koro, raviĝas mia animo; Eĉ mia karno ripozas senzorge.

¹⁰Ĉar Vi ne lasos mian animon al Ŝeol; Vi ne permesos, ke Via sanktulo forputru.

¹¹Vi konigos al mi la vojon de la vivo; Multe da ĝojoj estas antaŭ Vi, Ĉarmoj estas en Via dekstra mano eterne.