Read La Sankta Biblio esparanto Psalmo 22 Bible Online

Psalmo 22 - La Sankta Biblio esparanto bible

Psalmo 22

¹Al la ĥorestro. Por ario: Matenkrepuska Cervino. Psalmo de David. Mia Dio, mia Dio, kial Vi forlasis min, Kaj estas malproksima de mia savo, de miaj plendaj paroloj?

²Mia Dio, mi vokas en la tago, kaj Vi ne respondas; En la nokto, kaj mi ne trovas trankvilon.

³Sed Vi estas sankta, Ho Vi, kiu loĝas inter la glorado de Izrael.

⁴Vin fidis niaj patroj; Ili fidis, kaj Vi ilin helpis.

⁵Al Vi ili kriadis kaj estis savataj; Vin ili fidis, kaj ili ne devis honti.

⁶Sed mi estas vermo kaj ne homo; Mokata de la homoj, malestimata de la popolo.

⁷Ĉiuj, kiuj min vidas, insultas min, Malfermegas la buŝon, balancas la kapon, dirante:

⁸Li apogis sin al la Eternulo: Tiu helpu lin; Tiu savu lin, se Li amas lin.

⁹Vi eltiris ja min el la ventro, Vi zorgis pri mi sur la brusto de mia patrino.

¹⁰Al Vi mi estis ĵetita de post la momento de mia naskiĝo; De la ventro de mia patrino Vi estas mia Dio.

¹¹Ne malproksimiĝu de mi, Ĉar malfeliĉo estas proksima, kaj helpanton mi ne havas.

¹²Ĉirkaŭis min multaj bovoj, Fortaj bovoj Baŝanaj stariĝis ĉirkaŭ mi.

¹³Ili malfermegis kontraŭ mi siajn buŝojn, Kiel leono ŝiranta kaj krieganta.

¹⁴Kiel akvo mi disverŝiĝis, Kaj disiĝis ĉiuj miaj ostoj; Mia koro fariĝis kiel vakso, Fandiĝis en mia interno.

¹⁵Mia forto elsekiĝis kiel peco da poto; Mia lango algluiĝis al mia palato; Kaj Vi metas min en tomban polvon.

¹⁶Ĉar ĉirkaŭis min hundoj; Amaso da malbonuloj staras ĉirkaŭ mi; Ili mordas miajn manojn kaj piedojn.

¹⁷Mi povas kalkuli ĉiujn miajn ostojn; Ili rigardas kaj konstante rigardas.

¹⁸Ili dividas miajn vestojn inter si, Pri mia tuniko ili lotas.

¹⁹Sed Vi, ho Eternulo, ne malproksimiĝu; Mia forto, rapidu, por helpi min.

²⁰Savu de la glavo mian animon, Mian solan savu de la hundo.

²¹Savu min de buŝo de leono, Kaj helpu min kontraŭ kornoj de bubaloj.

²²Mi predikos Vian nomon al miaj fratoj; En la mezo de popola kunveno mi Vin gloros.

²³Respektantoj de la Eternulo, gloru Lin; Tuta semo de Jakob, honoru Lin; Tuta semo de Izrael, estimegu Lin.

²⁴Ĉar Li ne malŝatis kaj ne malestimis la suferojn de premato, Kaj ne kaŝis antaŭ li Sian vizaĝon; Sed aŭskultis lin, kiam tiu kriis al Li.

²⁵Vin mi gloros en granda komunumo; Mi plenumos miajn promesojn antaŭ Liaj respektantoj.

²⁶La humiluloj manĝu kaj satiĝu, Gloru la Eternulon Liaj serĉantoj; Via koro vivu eterne.

²⁷Rememoros kaj revenos al la Eternulo ĉiuj finoj de la mondo; Kaj kliniĝos antaŭ Vi ĉiuj popolaj familioj.

²⁸Ĉar al la Eternulo apartenas la reĝado; Li reĝas super la popoloj.

²⁹Manĝos kaj kliniĝos ĉiuj grasuloj de la tero; Antaŭ Li genufleksos ĉiuj forirantaj al la tombo Kaj nepovantaj konservi sian animon viva.

³⁰Naskotaro Lin servos; Oni predikos pri mia Sinjoro al la estonta generacio.

³¹Al naskota popolo oni venos kaj predikos Pri Lia justeco kaj pri Liaj faroj.