Read La Sankta Biblio esparanto Psalmo 24 Bible Online

Psalmo 24 - La Sankta Biblio esparanto bible

Psalmo 24

¹Psalmo de David. Al la Eternulo apartenas la tero, kaj ĉio, kio ĝin plenigas, La mondo kaj ĉiuj ĝiaj loĝantoj.

²Ĉar Li sur la maroj ĝin fondis Kaj sur la akvoj ĝin fortikigis.

³Kiu supreniros sur la monton de la Eternulo? Kaj kiu staros ĉe Lia sankta loko?

⁴Tiu, kiu havas purajn manojn kaj senmakulan koron, Kiu ne fordonis sian animon al malvero Kaj ne ĵuras trompe.

⁵Li ricevos benon de la Eternulo, Kaj bonfarojn de Dio, lia savanto.

⁶Tio estas la gento de Liaj adorantoj, De la serĉantoj de Via vizaĝo, ho Dio de Jakob. Sela.

⁷Levu, pordegoj, viajn kapojn; Kaj leviĝu, pordoj antikvaj, Por ke eniru la Reĝo de gloro.

⁸Kiu estas tiu Reĝo de gloro? La Eternulo forta kaj potenca, La Eternulo, la potenculo de milito.

⁹Levu, pordegoj, viajn kapojn; Kaj leviĝu, pordoj antikvaj, Por ke eniru la Reĝo de gloro.

¹⁰Kiu estas tiu Reĝo de gloro? La Eternulo Cebaot, Li estas la Reĝo de gloro. Sela.