Read La Sankta Biblio esparanto Psalmo 33 Bible Online

Psalmo 33 - La Sankta Biblio esparanto bible

Psalmo 33

¹Ĝoje kantu, ho piuloj, antaŭ la Eternulo; Al la justuloj konvenas glorado.

²Gloru la Eternulon per harpo, Per dekkorda psaltero ludu al Li.

³Kantu al Li novan kanton, Bone ludu al Li kun trumpetado.

⁴Ĉar ĝusta estas la vorto de la Eternulo, Kaj ĉiu Lia faro estas fidinda.

⁵Li amas justecon kaj juĝon; La tero estas plena de la boneco de la Eternulo.

⁶Per la vorto de la Eternulo estiĝis la ĉielo; Kaj per la spiro de Lia buŝo estiĝis ĝia tuta ekzistantaro.

⁷Li kolektis kiel en tenujon la akvon de la maro, Li metis la abismojn en konservejojn.

⁸Timu la Eternulon la tuta tero; Tremu antaŭ Li ĉiuj loĝantoj de la mondo.

⁹Ĉar Li diris, kaj tio fariĝis; Li ordonis, kaj tio aperis.

¹⁰La Eternulo neniigas la interkonsenton de la popoloj, Li detruas la intencojn de la nacioj.

¹¹La decido de la Eternulo restas eterne, La pensoj de Lia koro restas de generacio al generacio.

¹²Felica estas la popolo, kies Dio estas la Eternulo; La gento, kiun Li elektis al Si kiel heredon.

¹³El la ĉielo la Eternulo rigardas, Li vidas ĉiujn homidojn.

¹⁴De la trono, sur kiu Li sidas, Li rigardas ĉiujn, kiuj loĝas sur la tero,

¹⁵Li, kiu kreis la korojn de ili ĉiuj, Kiu rimarkas ĉiujn iliajn farojn.

¹⁶La reĝon ne helpos granda armeo, Fortulon ne savos granda forto.

¹⁷Vana estas la ĉevalo por helpo, Kaj per sia granda forto ĝi ne savos.

¹⁸Jen la okulo de la Eternulo estas sur tiuj, kiuj Lin timas, Kiuj esperas Lian favoron,

¹⁹Ke Li savu de morto ilian animon Kaj nutru ilin en tempo de malsato.

²⁰Nia animo fidas la Eternulon; Li estas nia helpo kaj nia ŝildo.

²¹Ĉar pro Li ĝojas nia koro, Ĉar ni fidas Lian sanktan nomon.

²²Via favoro, ho Eternulo, estu super ni, Kiel ni esperas al Vi.