Read La Sankta Biblio esparanto Psalmo 34 Bible Online

Psalmo 34 - La Sankta Biblio esparanto bible

Psalmo 34

¹De David, kiam li ŝajnigis sin freneza antaŭ Abimeleĥ, kaj tiu lin forpelis kaj li foriris. Mi gloros la Eternulon en ĉiu tempo; Ĉiam laŭdo por Li estos en mia buŝo.

²Per la Eternulo gloriĝas mia animo; La humiluloj aŭdu kaj ĝoju.

³Gloru la Eternulon kun mi, Kaj ni altigu kune Lian nomon.

⁴Mi serĉis la Eternulon, kaj Li respondis al mi, Kaj de ĉiuj miaj danĝeroj Li savis min.

⁵Kiuj rigardas al Li, ricevas lumon, Kaj ilia vizaĝo ne kovriĝos per honto.

⁶Jen ĉi tiu mizerulo vokis, kaj la Eternulo aŭdis, Kaj de ĉiuj liaj mizeroj Li savis lin.

⁷Anĝelo de la Eternulo postenas ĉirkaŭ tiuj, kiuj Lin timas, Kaj Li ilin savas.

⁸Provu kaj vidu, kiel bona estas la Eternulo; Feliĉa estas la homo, kiu Lin fidas.

⁹Timu la Eternulon, Liaj sanktuloj; Ĉar nenio mankas al tiuj, kiuj Lin timas.

¹⁰Leonidoj estas senhavaj kaj malsataj; Sed kiuj serĉas la Eternulon, tiuj havas mankon en nenia bono.

¹¹Venu, infanoj, aŭskultu min; Pri timo antaŭ la Eternulo mi vin instruos.

¹²Kiu ajn vi estas, homo, Kiu deziras vivon kaj amas multajn kaj bonajn tagojn:

¹³Gardu vian langon kontraŭ malbono, Kaj vian buŝon kontraŭ mensoga parolo;

¹⁴Dekliniĝu de malbono kaj faru bonon, Serĉu pacon kaj ĉasu ĝin.

¹⁵La okuloj de la Eternulo estas turnitaj al la piuloj, Kaj Liaj oreloj al iliaj krioj.

¹⁶La vizaĝo de la Eternulo estas kontraŭ tiuj, kiuj faras malbonon, Por ekstermi de la tero la memoron pri ili.

¹⁷Oni krias, kaj la Eternulo aŭdas, Kaj de ĉiuj iliaj mizeroj Li ilin savas.

¹⁸Proksima estas la Eternulo al tiuj, kies koro estas rompita, Kaj la spirite suferantajn Li helpas.

¹⁹Multaj estas la suferoj de piulo; Sed de ĉiuj la Eternulo lin savas.

²⁰Li gardas ĉiujn liajn ostojn; Eĉ unu el ili ne rompiĝos.

²¹La malbonulon mortigos la malbono; Kaj la malamantoj de piulo pereos.

²²La Eternulo liberigas la animon de Siaj sklavoj; Kaj ne pereos ĉiuj, kiuj Lin fidas.