Read La Sankta Biblio esparanto Psalmo 38 Bible Online

Psalmo 38 - La Sankta Biblio esparanto bible

Psalmo 38

¹Psalmo de David. Pro memoro. Ho Eternulo, ne en Via kolero min riproĉu, Kaj ne en Via furiozo min punu.

²Ĉar Viaj sagoj penetris en min, Kaj pezas sur mi Via mano.

³Ekzistas neniu sana loko en mia korpo pro Via kolero, Nenio sendifekta ekzistas en miaj ostoj pro mia peko.

⁴Ĉar miaj krimoj superas mian kapon; Kiel peza ŝarĝo, ili estas tro pezaj por mi.

⁵Malbonodoras kaj pusas miaj ulceroj Pro mia malsaĝeco.

⁶Mi kurbiĝis kaj kliniĝis treege, La tutan tagon mi iras malgaja.

⁷Ĉar miaj internaĵoj estas plenaj de brulumo, Kaj ne ekzistas sana loko en mia korpo.

⁸Mi tute senfortiĝis kaj kadukiĝis, Mi kriegas pro malkvieteco de mia koro.

⁹Mia Sinjoro, antaŭ Vi estas ĉiuj miaj deziroj, Kaj mia ĝemo ne estas kaŝita antaŭ Vi.

¹⁰Mia koro tremegas, forlasis min mia forto; Kaj eĉ la lumo de miaj okuloj ne estas ĉe mi.

¹¹Miaj amikoj kaj kamaradoj repaŝis pro mia pesto, Kaj miaj proksimuloj stariĝis malproksime.

¹²Kaj insidis kontraŭ mi tiuj, kiuj celas mian vivon, Kaj miaj malbondezirantoj parolas pri mia pereo, Kaj malicojn ili pripensas ĉiutage.

¹³Kaj mi estas kiel surdulo kaj ne aŭdas; Kiel mutulo, kiu ne malfermas sian buŝon.

¹⁴Mi estas kiel homo, kiu ne aŭdas Kaj kiu ne havas en sia buŝo reparolon.

¹⁵Sed al Vi, ho Eternulo, mi esperas; Vi aŭskultos, mia Sinjoro, mia Dio.

¹⁶Ĉar mi diris: Ili povus ĝoji pri mi; Ili fanfaronus pri mi, kiam mia piedo ekŝanceliĝus.

¹⁷Ĉar mi estas preta fali, Kaj mia sufero estas ĉiam antaŭ mi.

¹⁸Ĉar mi konfesas mian kulpon; Kaj min ĉagrenas mia peko.

¹⁹Kaj la malamikoj de mia vivo estas fortaj, Kaj multaj estas miaj senkaŭzaj malamantoj.

²⁰Kaj tiuj, kiuj pagas al mi malbonon por bono, Atakas min pro tio, ke mi celas bonon.

²¹Ne forlasu min, ho Eternulo; Mia Dio, ne malproksimiĝu de mi.

²²Rapidu, por helpi min, Mia Sinjoro, mia helpo!