Read La Sankta Biblio esparanto Psalmo 56 Bible Online

Psalmo 56 - La Sankta Biblio esparanto bible

Psalmo 56

¹Al la ĥorestro. Por Jonatelem-reĥokim. Verko de David, kiam kaptis lin la Filiŝtoj en Gat. Korfavoru min, ho Dio, ĉar homo volas min engluti, Dum la tuta tago malamiko min premas.

²Miaj malamikoj volas min engluti ĉiutage, Ĉar multaj militas kontraŭ mi fiere.

³En la tago, kiam mi timas, Mi fidas Vin.

⁴Dion, kies vorton mi gloras, Tiun Dion mi fidas; mi ne timas: Kion karno faros al mi?

⁵Dum la tuta tago ili atakas miajn vortojn; Ĉiuj iliaj pensoj pri mi estas por malbono.

⁶Ili kolektiĝas, embuskas, observas miajn paŝojn, Penante kapti mian animon.

⁷Por ilia malbonago repagu al ili, En kolero faligu la popolojn, ho Dio!

⁸Mian vagadon Vi kalkulis; Metu miajn larmojn en Vian felsakon, Ili estas ja en Via libro.

⁹Tiam miaj malamikoj returniĝos malantaŭen en la tago, kiam mi vokos; Tion mi scias, ke Dio estas kun mi.

¹⁰Mi gloros vorton de Dio; Mi gloros vorton de la Eternulo.

¹¹Dion mi fidas, mi ne timas: Kion faros al mi homo?

¹²Mi faris al Vi, ho Dio, promesojn, Mi plenumos al Vi dankoferojn.

¹³Ĉar Vi savis mian animon de la morto, Kaj miajn piedojn de falpuŝiĝo, Por ke mi iradu antaŭ Dio En la lumo de la vivo.