Read La Sankta Biblio esparanto Psalmo 7 Bible Online

Psalmo 7 - La Sankta Biblio esparanto bible

Psalmo 7

¹Senkulpiĝo de David, kiun li kantis al la Eternulo pri Kuŝ, la Benjamenido. Ho Eternulo, mia Dio, ĉe Vi mi rifuĝas; helpu min kontraŭ ĉiuj miaj persekutantoj, kaj savu min,

²Por ke oni ne elŝiru, kiel leono, mian animon, Ĝin disŝirante, dum neniu savas.

³Ho Eternulo, mia Dio! se mi faris ĉi tion, Se ekzistas maljusteco en miaj manoj,

⁴Se al mia amiko mi pagis per malbono, Aŭ se mi difektis tiun, kiu premis min senkaŭze:

⁵Tiam malamiko persekutu mian animon, Li atingu kaj enpremu mian vivon en la teron, Kaj mian honoron li metu en la polvon. Sela.

⁶Stariĝu, ho Eternulo, en Via kolero, Leviĝu super la furiozon de miaj premantoj; Kaj vekiĝu por mi, Vi, kiu ordonis fari juĝon.

⁷Kaj amaso da popoloj Vin ĉirkaŭos; Kaj super ili reiru supren.

⁸La Eternulo juĝas popolojn. Juĝu min, ho Eternulo, laŭ mia justeco kaj laŭ mia pieco.

⁹Finiĝu la malboneco de malpiuloj, kaj Vi subtenu justulon, Vi, kiu esploras korojn kaj internaĵojn, justa Dio!

¹⁰Mia ŝildo estas ĉe Dio, Kiu savas piajn korojn.

¹¹Dio estas juĝanto justa, Kaj Dio minacanta ĉiutage.

¹²Se oni ne reĝustiĝas, Li akrigas Sian glavon, Streĉas Sian pafarkon kaj direktas ĝin.

¹³Kaj Li pretigas por ĝi mortigilojn, Siajn sagojn Li faras bruligaj.

¹⁴Jen tiu gravediĝis per malbono, Portis en si malicon, kaj naskis mensogon.

¹⁵Li fosis kavon kaj profundigis ĝin, Kaj li falis en la kavon, kiun li pretigis.

¹⁶Lia malico refalos sur lian kapon, Kaj sur lian verton falos lia krimo.

¹⁷Mi gloros la Eternulon pro Lia justeco, Kaj kantos la nomon de la Eternulo Plejalta.