Read La Sankta Biblio esparanto Psalmo 72 Bible Online

Psalmo 72 - La Sankta Biblio esparanto bible

Psalmo 72

¹Pri Salomono. Ho Dio, Vian juĝon donu al la reĝo Kaj Vian justecon al la reĝido.

²Li juĝu Vian popolon kun vero Kaj Viajn prematojn kun justeco.

³La montoj alportu al la popolo pacon, Ankaŭ la montetoj, per justeco.

⁴Li juĝu la prematojn en la popolo, Li savu la filojn de senhavulo, Kaj li dispremu la premanton.

⁵Oni timu Vin tiel longe, kiel ekzistos la suno kaj la luno, De generacioj al generacioj.

⁶Li malleviĝu, kiel pluvo sur falĉitan herbejon; Kiel gutoj, kiuj malsekigas la teron.

⁷En liaj tagoj floru virtulo kaj granda paco, Ĝis ne plu ekzistos la luno.

⁸Li regu de maro ĝis maro Kaj de la Rivero ĝis la finoj de la tero.

⁹Kliniĝu antaŭ li la dezertanoj, Kaj liaj malamikoj leku polvon.

¹⁰La reĝoj de Tarŝiŝ kaj de la insuloj alportu donacojn; La reĝoj de Ŝeba kaj Seba venigu donojn.

¹¹Kliniĝu antaŭ li ĉiuj reĝoj; Ĉiuj popoloj lin servu.

¹²Ĉar li savos ploregantan malriĉulon Kaj senhelpan mizerulon.

¹³Li estos favorkora por malriĉulo kaj senhavulo, Kaj li savos la animojn de mizeruloj.

¹⁴De malico kaj krimo li savos iliajn animojn; Kaj kara estos ilia sango en liaj okuloj.

¹⁵Kaj li vivu, kaj oni donu al li el la oro de Ŝeba; Kaj oni ĉiam preĝu por li, kaj ĉiutage oni lin benu.

¹⁶Estu multe da greno en la lando; Sur la supro de la montoj ĝiaj spikoj ondiĝu kiel Lebanon; Kaj en la urboj ĉio floru, kiel herbo sur la tero.

¹⁷Lia nomo estu eterna; Tiel longe, kiel ekzistas la suno, kresku lia nomo; Ĉiuj popoloj sin benu per li kaj gloru lin.

¹⁸Glorata estu Dio la Eternulo, Dio de Izrael, Kiu sola faras miraklojn.

¹⁹Kaj laŭdata estu Lia glora nomo eterne; Kaj Lia gloro plenigu la tutan teron. Amen, kaj amen!

²⁰Finiĝis la preĝoj de David, filo de Jiŝaj.