Read La Sankta Biblio esparanto Psalmo 74 Bible Online

Psalmo 74 - La Sankta Biblio esparanto bible

Psalmo 74

¹Instruo de Asaf. Kial, ho Dio, Vi forpuŝis nin por ĉiam? Kial fumas Via kolero kontraŭ la ŝafoj de Via paŝtejo?

²Rememoru Vian komunumon, kiun Vi aĉetis en la tempo antikva, La genton de Via heredo, kiun Vi liberigis, Ĉi tiun monton Cion, sur kiu Vi loĝiĝis.

³Direktu Viajn paŝojn al la eternaj ruinoj, Al ĉio, kion detruis malamiko en la sanktejo.

⁴Krias Viaj malamikoj en Via domo, Metis tie siajn signojn.

⁵Oni vidas, kiel ili levas la hakilojn Kontraŭ la lignajn plektaĵojn.

⁶Kaj nun ĉiujn ĝiajn skulptaĵojn Ili dishakas per hakilo kaj marteloj.

⁷Ili bruligis per fajro Vian sanktejon, Malhonore alterigis la loĝejon de Via nomo.

⁸Ili diris en sia koro: Ni ruinigos ilin tute; Ili forbruligis ĉiujn domojn de Dio en la lando.

⁹Niajn signojn ni ne vidis; Jam ne ekzistas profeto, Kaj neniu ĉe ni scias, kiel longe tio daŭros.

¹⁰Kiel longe, ho Dio, mokos la premanto? Ĉu eterne la malamiko insultos Vian nomon?

¹¹Kial Vi retenas Vian brakon kaj Vian dekstran manon? Ekstermu ilin el Via basko.

¹²Dio estas ja mia Reĝo de antikve, Li faras savon sur la tero.

¹³Vi disŝiris per Via forto la maron, Vi rompis la kapojn de balenoj en la akvo;

¹⁴Vi disbatis la kapojn de la levjatano, Vi donis ĝin por manĝo al la bestoj de la dezerto;

¹⁵Vi elfendis fonton kaj torenton, Vi elsekigis potencajn riverojn.

¹⁶Al Vi apartenas la tago, kaj al Vi apartenas la nokto; Vi aranĝis lumon kaj sunon;

¹⁷Vi difinis ĉiujn limojn de la tero; La someron kaj la vintron Vi aranĝis.

¹⁸Rememoru tion, ke malamiko insultas la Eternulon Kaj popolo malsaĝa malhonoras Vian nomon.

¹⁹Ne fordonu al sovaĝa besto la animon de Via turto; La anaron de Viaj mizeruloj ne forgesu por ĉiam.

²⁰Rememoru la interligon, Ĉar ĉiuj mallumaj lokoj de la tero estas plenaj de rabejoj.

²¹La suferanto ne reiru hontigita; Malriĉulo kaj mizerulo gloru Vian nomon.

²²Leviĝu, ho Dio, defendu Vian aferon; Rememoru la malhonoron, kiun malsaĝulo faras al Vi ĉiutage.

²³Ne forgesu la krion de Viaj malamikoj; La bruo de tiuj, kiuj leviĝis kontraŭ Vi, konstante kreskas.