Read La Sankta Biblio esparanto Psalmo 80 Bible Online

Psalmo 80 - La Sankta Biblio esparanto bible

Psalmo 80

¹Al la ĥorestro. Por ŝoŝanoj. Atesto de Asaf. Psalmo. Ho Paŝtisto de Izrael, aŭskultu; Vi, kiu kondukas Jozefon, kiel ŝafojn, Vi, kiu sidas sur keruboj, aperu!

²Antaŭ Efraim kaj Benjamen kaj Manase veku Vian forton, Kaj venu, por savi nin.

³Ho Dio, revenigu nin kaj lumigu Vian vizaĝon, Por ke ni estu savitaj.

⁴Ho Eternulo, Dio Cebaot, Ĝis kiam Vi kolere repuŝos la preĝon de Via popolo?

⁵Vi manĝigis al ili panon larman, Kaj Vi trinkigis al ili larmojn per granda mezuro.

⁶Vi faris nin objekto de disputo por niaj najbaroj; Kaj niaj malamikoj nin mokas.

⁷Ho Dio Cebaot! revenigu nin kaj lumigu Vian vizaĝon, Por ke ni estu savitaj.

⁸Vinberbranĉon el Egiptujo Vi elportis, Vi forpelis popolojn kaj ĝin plantis;

⁹Vi purigis lokon por ĝi; Kaj ĝi profundigis siajn radikojn kaj plenigis la tutan landon;

¹⁰Montojn kovris ĝia ombro, Kaj ĝiaj branĉoj fariĝis kiel cedroj de Dio.

¹¹Ĝi etendis siajn branĉojn ĝis la maro Kaj siajn branĉetojn ĝis la Rivero.

¹²Kial Vi detruis ĝiajn barilojn, Ke ĉiuj pasantoj ĝin ŝiras?

¹³Subfosas ĝin arbara apro, Kaj kampa besto ĝin mordas.

¹⁴Ho Dio Cebaot, returniĝu; Rigardu el la ĉielo kaj vidu, kaj rememoru tiun vinbertrunkon,

¹⁵Kaj ŝirmu tion, kion plantis Via dekstra mano, Kaj la kreskaĵidon, kiun Vi fortikigis por Vi.

¹⁶Ĝi estas bruligita de fajro, krevinta; De Via minaca vizaĝo ili pereis.

¹⁷Via brako estu super la viro de Via dekstra mano, Super la homido, kiun Vi fortikigis por Vi.

¹⁸Kaj ni ne foriros de Vi; Vivigu nin, kaj ni vokos Vian nomon.

¹⁹Ho Eternulo, Dio Cebaot! revenigu nin, lumigu Vian vizaĝon, Por ke ni estu savitaj.