Read La Sankta Biblio esparanto Psalmo 85 Bible Online

Psalmo 85 - La Sankta Biblio esparanto bible

Psalmo 85

¹Al la ĥorestro. Psalmo de la Koraĥidoj. Vi korfavoris, ho Eternulo, Vian landon, Vi revenigis la forkaptitojn de Jakob;

²Vi pardonis la kulpon de Via popolo, Vi kovris ĉiujn ĝiajn pekojn. Sela.

³Vi retenis Vian tutan koleron, Forlasis Vian furiozon.

⁴Turnu Vin al ni, ho Dio de nia savo, Kaj ĉesigu Vian koleron kontraŭ ni.

⁵Ĉu eterne Vi nin koleros, Daŭrigos Vian koleron de generacio al generacio?

⁶Ĉu Vi ne revivigos nin denove, Ke Via popolo ĝoju per Vi?

⁷Aperigu al ni, ho Eternulo, Vian favoron, Kaj Vian helpon donu al ni.

⁸Mi aŭdu, kion diras Dio, la Eternulo; Ĉar Li deklaros pacon al Sia popolo kaj al Siaj fideluloj, Ke ili ne reiru al malsaĝeco.

⁹Jam proksima estas Lia helpo al tiuj, kiuj Lin timas, Por ke ekregu honoro en nia lando.

¹⁰Bono kaj vero renkontiĝas, Justeco kaj paco sin kisas.

¹¹Vero elkreskas el la tero, Kaj justeco rigardas el la ĉielo.

¹²Kaj la Eternulo donos bonon, Kaj nia tero donos siajn produktojn.

¹³Justeco iros antaŭ Li Kaj faros vojon por Liaj paŝoj.