Read La Sankta Biblio esparanto Psalmo 89 Bible Online

Psalmo 89 - La Sankta Biblio esparanto bible

Psalmo 89

¹Instruo de Etan, la Ezraĥido. La favorfarojn de la Eternulo mi kantos eterne; De generacio al generacio mi sciigos Vian fidelecon per mia buŝo.

²Ĉar mi diris: Por eterne estas fundamentita la boneco, En la ĉielo estas fortikigita Via fideleco.

³Mi faris interligon kun Mia elektito. Mi ĵuris al David, Mia sklavo:

⁴Por eterne Mi fortikigos vian semon, Kaj Mi konstruis vian tronon por ĉiuj generacioj. Sela.

⁵Kaj la ĉielo gloras Viajn miraklojn, ho Eternulo, Kaj Vian fidelecon en la anaro de la sanktuloj.

⁶Ĉar kiu en la ĉielo estas egala al la Eternulo? Kiu estas simila al la Eternulo inter la potenculoj?

⁷Dio estas potenca en la anaro de la sanktuloj, Kaj timinda por ĉiuj, kiuj Lin ĉirkaŭas.

⁸Ho Eternulo, Dio Cebaot, Kiu estas potenca kiel Vi, ho Eternulo? Kaj Via fideleco estas en ĉio, kio Vin ĉirkaŭas.

⁹Vi regas la malkvietecon de la maro; Kiam leviĝas ĝiaj ondoj, Vi ilin kvietigas.

¹⁰Vi faligis Rahabon, kiel mortigiton; Per Via forta brako Vi diskurigis Viajn malamikojn.

¹¹Al Vi apartenas la ĉielo, kaj ankaŭ al Vi apartenas la tero; La universon, kaj ĉion, kio ĝin plenigas, Vi fondis.

¹²La nordon kaj la sudon Vi kreis; Tabor kaj Ĥermon prikantas Vian nomon.

¹³Vi havas brakon kun forto; Potenca estas Via mano, alta estas Via dekstra.

¹⁴Virto kaj justeco estas la fundamento de Via trono; Boneco kaj vero iras antaŭ Via vizaĝo.

¹⁵Feliĉa estas la popolo, kiu konas trumpetadon; Ho Eternulo, en la lumo de Via vizaĝo ili marŝas;

¹⁶Pro Via nomo ili ĝojas la tutan tagon, Kaj ili fieras pro Via justeco.

¹⁷Ĉar Vi estas la beleco de ilia forto; Kaj pro Via favoro altiĝas nia korno.

¹⁸Ĉar de la Eternulo estas nia ŝildo, Kaj de la Sanktulo de Izrael estas nia reĝo.

¹⁹Tiam Vi parolis en vizio al Viaj fideluloj, Kaj Vi diris: Mi sendis helpon al heroo, Mi altigis elektiton el la popolo.

²⁰Mi trovis Davidon, Mian sklavon, Per Mia sankta oleo Mi lin ŝmiris.

²¹Mia mano lin subtenos, Kaj Mia brako lin fortikigos.

²²Ne venkos lin malamiko, Kaj malbonagulo lin ne premos.

²³Kaj Mi disbatos antaŭ lia vizaĝo liajn malamikojn, Kaj liajn malamantojn Mi frapos.

²⁴Kaj Mia fideleco kaj Mia favoro estas kun li; Kaj per Mia nomo altiĝos lia korno.

²⁵Kaj Mi etendos super la maron lian brakon Kaj super la riverojn lian dekstran manon.

²⁶Li vokos Min: Vi estas mia patro, Mia Dio, kaj la roko de mia savo.

²⁷Kaj Mi faros lin unuenaskito, Ĉefo super la reĝoj de la tero.

²⁸Por ĉiam Mi konservos al li Mian favoron; Kaj Mia interligo kun li estos fidela.

²⁹Kaj lian semon Mi faros eterna, Kaj lian tronon longedaŭra kiel la ĉielo.

³⁰Se liaj filoj forlasos Mian instruon Kaj ne iros laŭ Miaj leĝoj;

³¹Se Miajn decidojn ili malplenumos Kaj Miajn ordonojn ili ne observos:

³²Tiam Mi per bastono punos ilian pekon Kaj per batoj ilian krimon;

³³Sed Mian favoron Mi ne forprenos de li, Kaj Mian fidelecon Mi ne perfidos;

³⁴Mi ne malplenumos Mian interligon, Kaj tion, kio eliris el Mia buŝo, Mi ne ŝanĝos.

³⁵Unu aferon Mi ĵuris per Mia sankteco: Mi ne perfidos al David;

³⁶Lia semo estos eterna, Kaj lia trono estos kiel la suno antaŭ Mi.

³⁷Kiel la luno, ĝi staros eterne, Kaj kiel la atestulo en la ĉielo ĝi estos fidinda. Sela.

³⁸Sed nun Vi forpuŝis kaj malestimis, Vi koleris Vian sanktoleiton.

³⁹Vi disigis la interligon kun Via sklavo, Ĵetis sur la teron lian kronon.

⁴⁰Vi detruis ĉiujn liajn barilojn, Ruinigis liajn fortikaĵojn.

⁴¹Prirabas lin ĉiuj pasantoj; Li fariĝis mokataĵo por siaj najbaroj.

⁴²Vi altigis la dekstran manon de liaj malamikoj, Vi ĝojigis ĉiujn liajn kontraŭulojn.

⁴³Vi returnis la tranĉon de lia glavo, Kaj ne subtenis lin en la milito.

⁴⁴Vi forigis lian brilon, Kaj lian tronon Vi ĵetis sur la teron.

⁴⁵Vi mallongigis la tagojn de lia juneco, Vi kovris lin per honto. Sela.

⁴⁶Ĝis kiam, ho Eternulo, Vi kaŝos Vin senĉese Kaj Via kolerego brulos kiel fajro?

⁴⁷Ho, rememoru, kia estas la daŭro de mia vivo, Por kia vantaĵo Vi kreis ĉiujn homidojn.

⁴⁸Kiu homo vivas kaj neniam vidos morton, Savos sian animon de la mano de Ŝeol? Sela.

⁴⁹Kie estas Viaj antaŭaj favorfaroj, mia Sinjoro, Pri kiuj Vi ĵuris al David per Via fideleco?

⁵⁰Rememoru, mia Sinjoro, la malhonoron de Viaj sklavoj, Kiun mi portas en mia brusto de ĉiuj multaj popoloj,

⁵¹Kaj per kiu malhonoras Viaj malamikoj, ho Eternulo, Per kiu ili malhonoras la paŝosignojn de Via sanktoleito.

⁵²Glorata estu la Eternulo eterne. Amen, kaj Amen!