Read La Sankta Biblio esparanto Psalmo 91 Bible Online

Psalmo 91 - La Sankta Biblio esparanto bible

Psalmo 91

¹Kiu loĝas sub la ŝirmo de la Plejaltulo, Tiu ripozas en la ombro de la Plejpotenculo.

²Mi diras al la Eternulo: Mia rifuĝejo kaj mia fortikaĵo Estas Dio, kiun mi fidas.

³Ĉar Li savos vin de la reto de kaptisto, De la pereiga pesto.

⁴Per Siaj plumoj Li ŝirmos vin, Kaj sub Liaj flugiloj vi rifuĝos; Lia fideleco estas ŝildo kaj kiraso.

⁵Ne timu la teruron de nokto, Nek sagon, kiu flugas tage,

⁶Nek peston, kiu iras en mallumo, Nek epidemion, kiu ekstermas tagmeze.

⁷Ĉe via flanko falos milo, Kaj dek miloj ĉe via dekstra flanko; Sed vin ĝi ne tuŝos.

⁸Vi nur rigardos per viaj okuloj, Kaj vi vidos la redonon al la malvirtuloj.

⁹Ĉar Vi, ho Eternulo, estas mia defendo! La Plejaltulon vi elektis kiel vian rifuĝejon.

¹⁰Ne trafos vin malbono, Kaj frapo ne atingos vian tendon.

¹¹Ĉar al Siaj anĝeloj Li ordonis pri vi, Ke ili vin gardu sur ĉiuj viaj vojoj.

¹²Sur la manoj ili vin portos, Por ke vi ne falpuŝiĝu sur ŝtono per via piedo.

¹³Sur leonon kaj aspidon vi paŝos, Vi piedpremos leonidon kaj drakon.

¹⁴Ĉar li ekamis Min, tial Mi lin savos; Mi defendos lin, ĉar li konas Mian nomon.

¹⁵Li vokos Min, kaj Mi lin aŭskultos; Mi estos kun li en mizero; Mi lin liberigos kaj honoratigos.

¹⁶Mi satigos lin per longa vivo, Kaj aperigos al li Mian helpon.