Read La Sankta Biblio esparanto Psalmo 96 Bible Online

Psalmo 96 - La Sankta Biblio esparanto bible

Psalmo 96

¹Kantu al la Eternulo novan kanton; Kantu al la Eternulo la tuta tero.

²Kantu al la Eternulo, gloru Lian nomon, Proklamu de tago al tago Lian savon.

³Rakontu inter la popoloj Lian gloron, Inter ĉiuj gentoj Liajn miraklojn.

⁴Ĉar la Eternulo estas granda kaj tre glorinda, Li estas timinda pli ol ĉiuj dioj.

⁵Ĉar ĉiuj dioj de la popoloj estas nur idoloj; Sed la Eternulo kreis la ĉielon.

⁶Gloro kaj majesto estas antaŭ Li, Forto kaj beleco estas en Lia sanktejo.

⁷Tributu al la Eternulo, familioj de la popoloj; Tributu al la Eternulo gloron kaj potencon.

⁸Tributu al la Eternulo la honoron de Lia nomo; Alportu donacon kaj venu en Liajn kortojn.

⁹Kliniĝu al la Eternulo en sankta ornamo; Tremu antaŭ Li la tuta tero.

¹⁰Diru inter la popoloj: La Eternulo reĝas, Kaj fortikigita estas la mondo, ke ĝi ne ŝanceliĝu; Li juĝas la popolojn en justeco.

¹¹Ĝoju la ĉielo, kaj estu gaja la tero, Bruu la maro, kaj ĉio, kio ĝin plenigas.

¹²Ĝoju la kampo, kaj ĉio, kio estas sur ĝi; Tiam kantu ĉiuj arboj de la arbaro

¹³Antaŭ la Eternulo, ĉar Li venas, Ĉar Li venas, por juĝi la teron; Li juĝos la mondon kun justeco Kaj la popolojn kun Sia fideleco.