Read La Sankta Biblio esparanto Sentencoj 10 Bible Online

Sentencoj 10 - La Sankta Biblio esparanto bible

Sentencoj 10

¹Sentencoj de Salomono. Saĝa filo estas ĝojo por sia patro, Kaj filo malsaĝa estas malĝojo por sia patrino.

²Maljustaj trezoroj ne donas utilon; Sed bonfaremo savas de morto.

³La Eternulo ne malsatigos animon de piulo; Sed la avidon de malpiulo Li forpuŝas.

⁴Maldiligenta mano malriĉigas; Sed mano de diligentuloj riĉigas.

⁵Kiu kolektas dum la somero, tiu estas filo saĝa; Sed kiu dormas en la tempo de rikolto, tiu estas filo hontinda.

⁶Beno estas sur la kapo de piulo; Sed la buŝo de malpiulo kaŝas krimon.

⁷La memoro de piulo estas benata; Sed la nomo de malpiuloj forputros.

⁸Kiu havas saĝan koron, tiu akceptos moralordonojn; Sed kiu havas malsaĝan buŝon, tiu renversiĝos.

⁹Kiu iras en senkulpeco, tiu iras sendanĝere; Sed kiu kurbigas siajn vojojn, tiu estos punita.

¹⁰Kiu grimacas per la okulo, tiu kaŭzas suferon; Kaj kiu havas malsaĝan buŝon, tiu renversiĝos.

¹¹La buŝo de piulo estas fonto de vivo; Sed la buŝo de malpiulo kaŝas krimon.

¹²Malamo kaŭzas malpacon; Sed amo kovras ĉiujn pekojn.

¹³Sur la lipoj de prudentulo troviĝas saĝo; Sed vergo apartenas al la dorso de sensaĝulo.

¹⁴Saĝuloj konservas la scion; Sed la buŝo de malsaĝulo estas proksima al la pereo.

¹⁵La havo de riĉulo estas lia fortika urbo; Sed pereo por la malriĉuloj estas ilia malriĉo.

¹⁶La laborpago de piulo estas por la vivo; La enspezoj de malpiulo estas por peko.

¹⁷Kiu konservas la instruon, tiu iras al vivo; Sed kiu forĵetas atentigon, tiu restas en eraro.

¹⁸Kiu kaŝas malamon, tiu havas falseman buŝon; Kaj kiu elirigas kalumnion, tiu estas malsaĝulo.

¹⁹Ĉe multo da vortoj ne evitebla estas peko; Sed kiu retenas siajn lipojn, tiu estas saĝa.

²⁰La lango de piulo estas plej bonspeca arĝento; La koro de malpiuloj estas kiel nenio.

²¹La lipoj de piulo gvidas multajn; Sed malsaĝuloj mortas pro manko de saĝo.

²²La beno de la Eternulo riĉigas, Kaj malĝojon Li ne aldonas al ĝi.

²³Por malsaĝulo estas ĝojo fari malbonon; Kaj saĝo, por saĝulo.

²⁴Kio timigas malpiulon, tio trafos lin; Kaj kion deziras piuloj, tio estos donita al ili.

²⁵Kiel pasanta ventego, tiel malpiulo rapide malaperas; Sed piulo havas eternan fundamenton.

²⁶Kiel la vinagro por la dentoj kaj la fumo por la okuloj, Tiel la maldiligentulo estas por tiuj, kiuj lin sendis.

²⁷La timo antaŭ la Eternulo multigas la tagojn; Sed la jaroj de malpiuloj estos mallongigitaj.

²⁸La atendo de piuloj fariĝos ĝojo; Sed la espero de malpiuloj pereos.

²⁹La vojo de la Eternulo estas defendo por la senpekulo, Sed pereo por la malbonfarantoj.

³⁰Piulo neniam falpuŝiĝos; Sed la malpiuloj ne restos sur la tero.

³¹La buŝo de piulo eligas saĝon; Sed lango falsema estos ekstermita.

³²La lipoj de piulo anoncas favoraĵon, Kaj la buŝo de malpiuloj malicaĵon.