Read La Sankta Biblio esparanto Sentencoj 11 Bible Online

Sentencoj 11 - La Sankta Biblio esparanto bible

Sentencoj 11

¹Malvera pesilo estas abomenaĵo por la Eternulo; Sed plena pezo plaĉas al Li.

²Se venis malhumileco, venos ankaŭ honto; Sed ĉe la humiluloj estas saĝo.

³La senkulpeco de la piuloj gvidos ilin; Sed la falsemo pereigos la maliculojn.

⁴Ne helpos riĉo en la tago de kolero; Sed bonfaremo savas de morto.

⁵La justeco de piulo ebenigas lian vojon; Sed malpiulo falos per sia malpieco.

⁶La justeco de piuloj savos ilin; Sed la pasio de maliculoj ilin kaptos.

⁷Kiam mortas homo pia, ne pereas lia espero; Sed la atendo de la pekuloj pereas.

⁸Piulo estas savata kontraŭ mizero, Kaj malpiulo venas sur lian lokon.

⁹Per la buŝo de hipokritulo difektiĝas lia proksimulo; Sed per kompreno piuloj saviĝas.

¹⁰Kiam al la piuloj estas bone, la urbo ĝojas; Kaj kiam pereas malpiuloj, ĝi estas gaja.

¹¹Per la beno de piuloj urbo altiĝas; Kaj per la buŝo de malpiuloj ĝi ruiniĝas.

¹²Kiu mokas sian proksimulon, tiu estas malsaĝulo; Sed homo prudenta silentas.

¹³Kiu iras kun kalumnioj, tiu elperfidas sekreton; Sed kiu havas fidelan spiriton, tiu konservas aferon.

¹⁴Ĉe manko de prikonsiliĝo popolo pereas; Sed ĉe multe da konsilantoj estas bonstato.

¹⁵Malbonon faras al si tiu, kiu garantias por fremdulo; Sed kiu malamas donadon de mano, tiu estas ekster danĝero.

¹⁶Aminda virino akiras honoron, Kaj potenculoj akiras riĉon.

¹⁷Bonkora homo donos bonon al sia animo, Kaj kruelulo detruas sian karnon.

¹⁸Malvirtulo akiras profiton malveran, Kaj la semanto de virto veran rekompencon.

¹⁹Bonfarado kondukas al vivo; Kaj kiu celas malbonon, tiu iras al sia morto.

²⁰Abomenaĵo por la Eternulo estas la malickoruloj; Sed plaĉas al Li tiuj, kiuj iras vojon pian.

²¹Oni povas esti certa, ke malvirtulo ne restos senpuna; Sed la idaro de virtuloj estos savita.

²²Kiel ora ringo sur la nazo de porko, Tiel estas virino bela, sed malbonkonduta.

²³La deziro de virtuloj estas nur bono; Sed malvirtuloj povas esperi nur koleron.

²⁴Unu disdonas, kaj riĉiĝas ĉiam pli; Alia tro avaras, kaj tamen nur malriĉiĝas.

²⁵Animo benanta ĝuos bonstaton; Kaj kiu trinkigas, tiu mem havos sufiĉe por trinki.

²⁶Kiu retenas grenon, tiun malbenas la popolo; Sed beno venas sur la kapon de tiu, kiu disdonas.

²⁷Kiu celas bonon, tiu atingos plaĉon; Sed kiu serĉas malbonon, tiun ĝi trafos.

²⁸Kiu fidas sian riĉecon, tiu falos; Sed virtuloj floros kiel juna folio.

²⁹Kiu detruas sian domon, tiu heredos venton; Kaj malsaĝulo estas sklavo de saĝulo.

³⁰La frukto de virtulo estas arbo de vivo; Kaj akiranto de animoj estas saĝulo.

³¹Se virtulo ricevas redonon sur la tero, Tiom pli malvirtulo kaj pekulo!