Read La Sankta Biblio esparanto Sentencoj 13 Bible Online

Sentencoj 13 - La Sankta Biblio esparanto bible

Sentencoj 13

¹Saĝa filo lernas de la patro; Sed mokanto ne aŭskultas moralinstruon.

²La frukto de la buŝo donas al homo bonan manĝon; Sed la deziro de krimuloj estas perforto.

³Kiu gardas sian buŝon, tiu gardas sian animon; Kiu tro malfermas sian buŝon, tiu pereas.

⁴La animo de maldiligentulo deziras, kaj ne ricevas; Sed la animo de diligentuloj satiĝas.

⁵Vorton malveran virtulo malamas; Sed malvirtulo agas abomene kaj venas al honto.

⁶La virto gardas tiun, kiu iras ĝustan vojon; Sed la malvirto pereigas pekulon.

⁷Unu ŝajnigas sin riĉa, havante nenion; Alia ŝajnigas sin malriĉa, havante grandan riĉecon.

⁸Per sia riĉeco homo savas sian animon; Sed malriĉulo ne aŭskultas atentigon.

⁹La lumo de virtuloj brilegas; Sed la lumilo de malvirtuloj estingiĝos.

¹⁰Nur de malhumileco venas malpaco; Sed la akceptantaj konsilojn havas saĝon.

¹¹Riĉeco rapide akirita malgrandiĝas; Sed kion oni kolektas per laboro, tio multiĝas.

¹²Espero prokrastata dolorigas la koron; Sed plenumita deziro estas arbo de vivo.

¹³Kiu malŝatas diron, tiu malutilas al si mem; Sed respektanta ordonon estos rekompencita.

¹⁴Instruo de saĝulo estas fonto de vivo, Por evitigi la retojn de la morto.

¹⁵Bona prudento plaĉigas; Sed la vojo de perfiduloj estas malglata.

¹⁶Ĉiu prudentulo agas konscie; Sed malsaĝulo elmontras malsaĝecon.

¹⁷Malbona sendito falas en malfeliĉon; Sed sendito fidela sanigas.

¹⁸Malriĉa kaj hontigata estos tiu, kiu forpuŝas instruon; Sed kiu observas instruon, tiu estos estimata.

¹⁹Deziro plenumita estas agrabla por la animo; Sed malagrable por la malsaĝuloj estas deturni sin de malbono.

²⁰Kiu iras kun saĝuloj, tiu estos saĝa; Sed kamarado de malsaĝuloj suferos doloron.

²¹Pekulojn persekutas malbono; Sed virtulojn rekompencas bono.

²²Bonulo heredigas la nepojn; Kaj por virtulo konserviĝas la havo de pekulo.

²³Multe da manĝaĵo estas sur la kampo de malriĉuloj; Sed multaj pereas pro manko de justeco.

²⁴Kiu ŝparas sian vergon, tiu malamas sian filon; Sed kiu lin amas, tiu baldaŭ lin punas.

²⁵Virtulo manĝas, por satigi sian animon; Sed la ventro de malvirtuloj havas mankon.