Read La Sankta Biblio esparanto Sentencoj 14 Bible Online

Sentencoj 14 - La Sankta Biblio esparanto bible

Sentencoj 14

¹Saĝa virino konstruas sian domon; Sed malsaĝa detruas ĝin per siaj manoj.

²Kiu iras la ĝustan vojon, tiu timas la Eternulon; Sed kiu iras vojon malĝustan, tiu Lin malestimas.

³En la buŝo de malsaĝulo estas vergo por lia malhumileco; Sed la buŝo de saĝuloj ilin gardas.

⁴Se ne ekzistas bovoj, la grenejoj estas malplenaj; Sed multe da profito estas de la forto de bovoj.

⁵Verama atestanto ne mensogas; Sed atestanto falsama elspiras mensogojn.

⁶Mokanto serĉas saĝecon kaj ĝin ne trovas; Sed por saĝulo la sciado estas facila.

⁷Foriru de homo malsaĝa; Ĉar vi ne aŭdos parolon de saĝo.

⁸La saĝeco de saĝulo estas komprenado de sia vojo; Kaj la malsaĝeco de malsaĝuloj estas trompiĝado.

⁹Malsaĝuloj ŝercas pri siaj kulpoj; Sed inter virtuloj ekzistas reciproka favoro.

¹⁰Koro scias sian propran malĝojon; Kaj en ĝia ĝojo ne partoprenas fremdulo.

¹¹Domo de malvirtuloj estos ekstermita; Sed dometo de virtuloj floros.

¹²Iufoje vojo ŝajnas ĝusta al homo, Kaj tamen ĝia fino kondukas al la morto.

¹³Ankaŭ dum ridado povas dolori la koro; Kaj la fino de ĝojo estas malĝojo.

¹⁴Laŭ siaj agoj manĝos homo malbonkora; Kaj homo bona satiĝos per siaj faroj.

¹⁵Naivulo kredas ĉiun vorton; Sed saĝulo estas atenta pri sia vojo.

¹⁶Saĝulo timas, kaj forkliniĝas de malbono; Sed malsaĝulo estas incitiĝema kaj memfidema.

¹⁷Malpacienculo faras malsaĝaĵojn; Kaj malbonintenculo estas malamata.

¹⁸Naivuloj akiras malsaĝecon; Sed saĝuloj estas kronataj de klereco.

¹⁹Malbonuloj humiliĝos antaŭ bonuloj; Kaj malvirtuloj estos antaŭ la pordego de virtulo.

²⁰Malriĉulo estas malamata eĉ de sia proksimulo; Sed riĉulo havas multe da amikoj.

²¹Kiu malŝatas sian proksimulon, tiu estas pekulo; Sed kiu kompatas malriĉulojn, tiu estas feliĉa.

²²Ĉu ne eraras malbonintenculoj? Sed favorkoreco kaj vero estas ĉe tiuj, kiuj havas bonajn intencojn.

²³De ĉiu laboro estos profito; Sed de babilado venas nur senhaveco.

²⁴Propra riĉeco estas krono por la saĝuloj; Sed la malsaĝeco de la malsaĝuloj restas malsaĝeco.

²⁵Verparola atestanto savas animojn; Sed malverparola elspiras trompon.

²⁶En la timo antaŭ la Eternulo estas forta fortikaĵo; Kaj Li estos rifuĝejo por Siaj infanoj.

²⁷La timo antaŭ la Eternulo estas fonto de vivo, Por evitigi la retojn de la morto.

²⁸Grandeco de popolo estas gloro por reĝo; Kaj manko de popolo pereigas la reganton.

²⁹Pacienculo havas multe da saĝo; Sed malpacienculo elmontras malsaĝecon.

³⁰Trankvila koro estas vivo por la korpo; Sed envio estas puso por la ostoj.

³¹Kiu premas malriĉulon, tiu ofendas lian Kreinton; Kaj kiu Lin honoras, tiu kompatas malriĉulon.

³²Pro sia malboneco malvirtulo estos forpuŝita; Sed virtulo eĉ mortante havas esperon.

³³En la koro de saĝulo ripozas saĝo; Kaj kio estas en malsaĝuloj, tio elmontriĝas.

³⁴Virto altigas popolon; Sed peko pereigas gentojn.

³⁵Favoron de la reĝo havas sklavo saĝa; Sed kontraŭ malbonkonduta li koleras.