Read La Sankta Biblio esparanto Sentencoj 2 Bible Online

Sentencoj 2 - La Sankta Biblio esparanto bible

Sentencoj 2

¹Mia filo! se vi akceptos miajn parolojn Kaj konservos ĉe vi miajn ordonojn,

²Ke via orelo atente aŭskultos saĝon Kaj vian koron vi inklinigos al komprenado;

³Se vi vokos la prudenton Kaj direktos vian voĉon al la saĝo:

⁴Se vi serĉos ĝin kiel arĝenton, Serĉegos kiel trezoron:

⁵Tiam vi komprenos la timon antaŭ la Eternulo, Kaj vi akiros konadon pri Dio.

⁶Ĉar la Eternulo donas saĝon; El Lia buŝo venas scio kaj kompreno.

⁷Li havas helpon por la virtuloj; Li estas ŝildo por tiuj, kiuj vivas pie.

⁸Li gardas la iradon de la justo, Kaj zorgas pri la vojo de Siaj piuloj.

⁹Tiam vi komprenos veremon kaj juston Kaj pion kaj ĉiun bonan vojon.

¹⁰Ĉar saĝo venos en vian koron, Kaj scio estos agrabla por via animo.

¹¹Bona konscio vin gvidos, Prudento vin gardos,

¹²Por savi vin de la vojo de malbono, De homo, parolanta kontraŭveraĵon,

¹³De tiuj, kiuj forlasas la ĝustan vojon, Por iri la vojojn de mallumo,

¹⁴Kiuj ĝojas, kiam ili faras malbonon, Trovas plezuron en la malordo de la malboneco,

¹⁵Kies vojoj estas malrektaj Kaj kies irado deflankiĝis;

¹⁶Por savi vin de fremda virino, De edzino ne via, kies paroloj estas glataj,

¹⁷Kiu forlasas la amikon de sia juneco, Kaj forgesas la ligon de sia Dio;

¹⁸Ĉar ŝia domo kondukas al morto, Kaj ŝiaj paŝoj al la inferuloj;

¹⁹Ĉiuj, kiuj eniras al ŝi, ne revenas, Kaj ne reatingas la vojon de la vivo;

²⁰Ke vi iru la vojon de bonuloj, Kaj sekvu la paŝosignojn de piuloj.

²¹Ĉar la piuloj loĝos sur la tero, Kaj la senpekuloj restos sur ĝi;

²²Sed la malpiuloj estos ekstermitaj de sur la tero, Kaj la maliculoj estos malaperigitaj de tie.