Read La Sankta Biblio esparanto Sentencoj 22 Bible Online

Sentencoj 22 - La Sankta Biblio esparanto bible

Sentencoj 22

¹Nomo bona estas pli preferinda, ol granda riĉeco; Kaj bona estimo, ol arĝento kaj oro.

²Riĉulo kaj malriĉulo renkontiĝas: Ilin ambaŭ kreis la Eternulo.

³Prudentulo antaŭvidas malbonon, kaj kaŝiĝas; Sed naivuloj antaŭenpaŝas, kaj difektiĝas.

⁴Por humileco kaj timo antaŭ la Eternulo Oni ricevas riĉecon kaj honoron kaj vivon.

⁵Dornoj kaj retoj estas sur la vojo de malbonagulo; Kiu gardas sian animon, tiu malproksimiĝas de ili.

⁶Instruu knabon konforme al lia vojo, Kaj eĉ maljuniĝinte li ne dekliniĝos de ĝi.

⁷Riĉulo regas super malriĉuloj, Kaj kiu prunteprenas, tiu estas sklavo de la pruntedoninto.

⁸Kiu semas maljustaĵon, tiu rikoltos suferon, Kaj la kano de lia krueleco rompiĝos.

⁹Bonokululo estos benata; Ĉar li donas el sia pano al malriĉulo.

¹⁰Forpelu blasfemulon, kaj foriros malpaco, Kaj ĉesiĝos malkonsento kaj ofendo.

¹¹Kiu amas purecon de koro kaj agrable parolas, Al tiu la reĝo estas amiko.

¹²La okuloj de la Eternulo gardas la prudenton; Sed la vortojn de maliculo Li renversas.

¹³Mallaborulo diras: Leono estas ekstere, Mi povus esti mortigita meze de la strato.

¹⁴La buŝo de malĉastulino estas profunda foso; Kiun la Eternulo koleras, tiu tien enfalas.

¹⁵Malsaĝeco forte sidas en la koro de knabo; Sed vergo punanta ĝin elpelas el ĝi.

¹⁶Kiu premas malriĉulon, por pligrandigi sian riĉecon, Tiu donas al riĉulo, por ke li malriĉiĝu.

¹⁷Klinu vian orelon kaj aŭskultu vortojn de saĝuloj, Kaj direktu vian koron al mia instruo;

¹⁸Ĉar ili estos agrablaj, se vi gardos ilin en via interno; Ili estos ĉiuj pretaj sur viaj lipoj.

¹⁹Ke al la Eternulo estu via fido, Tion mi instruis al vi hodiaŭ.

²⁰Ĉu mi ne skribis al vi tion trifoje Kun konsiloj kaj scio,

²¹Por sciigi al vi la ĝustecon de la paroloj de vero, Por ke vi transdonu la parolojn de vero al tiuj, kiuj vin sendis?

²²Ne prirabu malriĉulon, pro tio, ke li estas malriĉa; Kaj ne premu senhavulon ĉe la pordego;

²³Ĉar la Eternulo defendos ilian aferon Kaj dispremos iliajn premantojn.

²⁴Ne amikiĝu kun homo kolerema, Kaj ne komunikiĝu kun homo flamiĝema;

²⁵Ke vi ne lernu lian vojon Kaj ne ricevu reton por via animo.

²⁶Ne estu inter tiuj, kiuj firmigas per mano, Kiuj garantias por ŝuldoj.

²⁷Se vi ne havos per kio pagi, Oni ja prenos vian litaĵon de sub vi.

²⁸Ne forŝovu la antikvajn limojn, Kiujn faris viaj patroj.

²⁹Se vi vidas homon lertan en sia profesio, li staros antaŭ reĝoj; Li ne staros antaŭ maleminentuloj.