Read La Sankta Biblio esparanto Sentencoj 24 Bible Online

Sentencoj 24 - La Sankta Biblio esparanto bible

Sentencoj 24

¹Ne sekvu malbonajn homojn, Kaj ne deziru esti kun ili;

²Ĉar ilia koro pensas pri perfortaĵo, Kaj ilia buŝo parolas malbonaĵon.

³Per saĝo konstruiĝas domo, Kaj per prudento ĝi fortikiĝas;

⁴Kaj per sciado la ĉambroj pleniĝas Per ĉia havo grandvalora kaj agrabla.

⁵Homo saĝa havas forton, Kaj homo prudenta estas potenca.

⁶Kun pripenso faru militon; Kaj venko venas per multe da konsilantoj.

⁷Tro alta estas la saĝo por malsaĝulo; Ĉe la pordego li ne malfermos sian buŝon.

⁸Kiu intencas fari malbonon, Tiun oni nomas maliculo.

⁹Malico de malsaĝulo estas peko; Kaj blasfemanto estas abomenaĵo por homo.

¹⁰Se vi montriĝis malforta en tago de mizero, Via forto estas ja malgranda.

¹¹Savu tiujn, kiujn oni prenis por mortigi, Kaj ne fortiriĝu de tiuj, kiuj estas kondamnitaj al morto.

¹²Se vi diras: Ni tion ne sciis, La esploranto de koroj ja komprenas, Kaj la gardanto de via animo ja scias, Kaj Li redonas al homo laŭ liaj faroj.

¹³Manĝu, mia filo, mielon, ĉar ĝi estas bona; Kaj la mieltavolo estas dolĉa por via gorĝo;

¹⁴Tia estas por via animo la sciado de saĝo, se vi ĝin trovis, Kaj ekzistas estonteco, kaj via espero ne pereos.

¹⁵Ne insidu, ho malvirtulo, kontraŭ la domo de virtulo; Ne ataku lian ripozejon;

¹⁶Ĉar sep fojojn virtulo falos, kaj tamen leviĝos; Sed malvirtuloj implikiĝas en la malfeliĉo.

¹⁷Kiam falas via malamiko, ne ĝoju, Kaj ĉe lia malfeliĉo via koro ne plezuriĝu;

¹⁸Ĉar eble la Eternulo vidos, kaj tio ne plaĉos al Li, Kaj Li returnos de li Sian koleron.

¹⁹Ne koleru kontraŭ malbonfarantoj, Kaj ne enviu la malvirtulojn;

²⁰Ĉar la malbonulo ne havos estontecon; La lumilo de malvirtuloj estingiĝos.

²¹Timu, mia filo, la Eternulon kaj la reĝon; Kun ribeluloj ne komunikiĝu.

²²Ĉar subite venos ilia pereo; Kaj kiu scias, kiam venos la puno de ambaŭ?

²³Ankaŭ ĉi tio estas vortoj de saĝuloj: Konsideri personojn ĉe juĝado estas ne bone.

²⁴Kiu diras al malvirtulo: Vi estas virtulo, Tiun malbenos popoloj, tiun malamos gentoj.

²⁵Sed kiuj faras riproĉojn, tiuj plaĉas, Kaj sur ilin venos bona beno.

²⁶Kiu respondas ĝustajn vortojn, Tiu kisas per la lipoj.

²⁷Plenumu vian laboron ekstere, Pretigu ĉion sur via kampo; Kaj poste aranĝu vian domon.

²⁸Ne atestu sen kaŭzo kontraŭ via proksimulo; Ĉu vi trompus per via buŝo?

²⁹Ne diru: Kiel li agis kontraŭ mi, tiel mi agos kontraŭ li; Mi redonos al la homo laŭ lia faro.

³⁰Mi pasis tra kampo de homo maldiligenta Kaj tra vinberĝardeno de sensaĝulo;

³¹Kaj jen ĉie elkreskis urtiko, Ĉio estas kovrita de dornoj, Kaj la ŝtona muro estas detruita.

³²Kaj kiam mi vidis, mi prenis ĝin en mian koron, Mi rigardis, kaj ricevis instruon:

³³Iom da dormo, iom da dormeto, Iom da kunmeto de la manoj por kuŝado;

³⁴Kaj venos via malriĉeco kiel rabisto, Kaj via senhaveco kiel viro armita.