Read La Sankta Biblio esparanto Sentencoj 25 Bible Online

Sentencoj 25 - La Sankta Biblio esparanto bible

Sentencoj 25

¹Ankaŭ ĉi tio estas sentencoj de Salomono, kiujn kolektis la viroj de Ĥizkija, reĝo de Judujo.

²Honoro de Dio estas kaŝi aferon; Sed honoro de reĝoj estas esplori aferon.

³La ĉielo estas alta, la tero estas profunda, Kaj la koro de reĝoj estas neesplorebla.

⁴Forigu de arĝento la almiksaĵon, Kaj la puriganto ricevos vazon.

⁵Forigu malvirtulon de la reĝo, Kaj lia trono fortikiĝos en justeco.

⁶Ne montru vin granda antaŭ la reĝo, Kaj sur la loko de eminentuloj ne stariĝu;

⁷Ĉar pli bone estas, se oni diros al vi: Leviĝu ĉi tien, Ol se oni malaltigos vin antaŭ eminentulo, Kiun vidis viaj okuloj.

⁸Ne komencu tuj disputi; Ĉar kion vi faros poste, kiam via proksimulo vin hontigos?

⁹Faru disputon kun via proksimulo mem, Sed sekreton de aliulo ne malkaŝu;

¹⁰Ĉar alie aŭdanto vin riproĉos, Kaj vian babilon vi jam ne povos repreni.

¹¹Vorto dirita en ĝusta tempo Estas kiel oraj pomoj sur retaĵo arĝenta.

¹²Kiel ora orelringo kaj multekosta kolringo, Tiel estas saĝa admonanto por aŭskultanta orelo.

¹³Kiel malvarmo de neĝo en la tempo de rikolto, Tiel estas fidela sendito por siaj sendintoj: Li revigligas la animon de sia sinjoro.

¹⁴Kiel nuboj kaj vento sen pluvo, Tiel estas homo, kiu fanfaronas per dono, kiun li ne faras.

¹⁵Per pacienco oni altiras al si potenculon, Kaj mola parolo rompas oston.

¹⁶Kiam vi trovis mielon, manĝu, kiom vi bezonas, Por ke vi ne fariĝu tro sata kaj ne elvomu ĝin.

¹⁷Detenu vian piedon de la domo de via proksimulo; Ĉar alie vi tedus lin kaj li vin malamus.

¹⁸Kiel martelo kaj glavo kaj akra sago Estas tiu homo, kiu parolas pri sia proksimulo malveran ateston.

¹⁹Kiel putra dento kaj malforta piedo Estas nefidinda espero en tago de mizero.

²⁰Kiel demeto de vesto en tempo de malvarmo, kiel vinagro sur natro, Tiel estas kantado de kantoj al koro suferanta.

²¹Se via malamanto estas malsata, manĝigu al li panon; Kaj se li estas soifa, trinkigu al li akvon;

²²Ĉar fajrajn karbojn vi kolektos sur lia kapo, Kaj la Eternulo vin rekompencos.

²³Norda vento kaŭzas pluvon, Kaj ĉagrenita vizaĝo kaŝatan parolon.

²⁴Pli bone estas loĝi sur angulo de tegmento, Ol kun malpacema edzino en komuna domo.

²⁵Kiel malvarma akvo por suferanto de soifo, Tiel estas bona sciigo el lando malproksima.

²⁶Virtulo, kiu falas antaŭ malvirtulo, Estas malklara fonto kaj malbonigita puto.

²⁷Ne bone estas manĝi tro multe da mielo; Kaj ne glore estas serĉi sian gloron.

²⁸Homo, kiu ne povas regi sian spiriton, Estas urbo detruita, kiu ne havas muron.