Read La Sankta Biblio esparanto Sentencoj 27 Bible Online

Sentencoj 27 - La Sankta Biblio esparanto bible

Sentencoj 27

¹Ne fanfaronu pri la morgaŭa tago; Ĉar vi ne scias, kion naskos la tago.

²Alia vin laŭdu, sed ne via buŝo; Fremdulo, sed ne viaj lipoj.

³Peza estas ŝtono, kaj sablo estas ŝarĝo; Sed kolero de malsaĝulo estas pli peza ol ambaŭ.

⁴Kolero estas kruelaĵo, kaj furiozo estas superakvego; Sed kiu sin tenos kontraŭ envio?

⁵Pli bona estas riproĉo nekaŝita, Ol amo kaŝita.

⁶Fidelkoraj estas la batoj de amanto; Sed tro multaj estas la kisoj de malamanto.

⁷Sata animo malŝatas mieltavolon, Sed por malsata animo ĉio maldolĉa estas dolĉa.

⁸Kiel birdo, kiu forlasis sian neston, Tiel estas homo, kiu forlasis sian lokon.

⁹Oleo kaj odorfumaĵo ĝojigas la koron, Kaj la konsilo de amiko estas dolĉaĵo por la animo.

¹⁰Ne forlasu vian amikon kaj la amikon de via patro, Kaj en la domon de via frato ne iru en la tago de via mizero; Pli bona estas najbaro proksima, ol frato malproksima.

¹¹Estu saĝa, mia filo, kaj ĝojigu mian koron; Kaj mi havos kion respondi al mia insultanto.

¹²Prudentulo antaŭvidas malbonon, kaj kaŝiĝas; Sed naivuloj antaŭenpaŝas, kaj difektiĝas.

¹³Prenu la veston de tiu, kiu garantiis por aliulo; Kaj pro la fremduloj prenu de li garantiaĵon.

¹⁴Kiu frue matene benas sian proksimulon per laŭta voĉo, Tiu estos opiniata malbenanto.

¹⁵Defluilo en pluva tago Kaj malpacema edzino estas egalaj.

¹⁶Kiu ŝin retenas, tiu retenas venton Kaj volas kapti oleon per sia dekstra mano.

¹⁷Fero akriĝas per fero, Kaj homon akrigas la rigardo de lia proksimulo.

¹⁸Kiu gardas figarbon, tiu manĝos ĝiajn fruktojn; Kaj kiu gardas sian sinjoron, tiu estos honorata.

¹⁹Kiel en la akvo vizaĝo speguliĝas al vizaĝo, Tiel la koro de homo estas kontraŭ alia koro.

²⁰Ŝeol kaj la abismo neniam satiĝas; Kaj ankaŭ la okuloj de homo neniam satiĝas.

²¹Kiel fandujo por arĝento kaj forno por oro, Tiel estas por homo la buŝo de lia laŭdanto.

²²Se vi pistos malsaĝulon en pistujo inter griaĵo, Lia malsaĝeco de li ne apartiĝos.

²³Bone konu viajn ŝafojn, Atentu viajn brutarojn.

²⁴Ĉar riĉeco ne daŭras eterne, Kaj krono ne restas por ĉiuj generacioj.

²⁵Aperas herbo, montriĝas verdaĵo, Kaj kolektiĝas kreskaĵoj de la montoj.

²⁶Ŝafidoj estas, por vesti vin, Kaj kaproj, por doni al vi la eblon aĉeti kampon.

²⁷Estas sufiĉe da kaprina lakto, por nutri vin, por nutri vian domon, Kaj por subteni la vivon de viaj servantinoj.