Read La Sankta Biblio esparanto Sentencoj 3 Bible Online

Sentencoj 3 - La Sankta Biblio esparanto bible

Sentencoj 3

¹Mia filo! ne forgesu mian instruon, Kaj via koro konservu miajn ordonojn.

²Ĉar ili akirigos al vi longan vivon, Jarojn de vivo kaj paco.

³Favoro kaj vero vin ne forlasu; Alligu ilin al via kolo, Skribu ilin sur la tabeloj de via koro.

⁴Kaj vi trovos favoron kaj bonan opinion Ĉe Dio kaj homoj.

⁵Fidu la Eternulon per via tuta koro, Kaj ne fidu vian prudenton.

⁶Konsciu Lin en ĉiuj viaj vojoj, Kaj Li ĝustigos vian iradon.

⁷Ne opiniu vin saĝa; Timu la Eternulon, kaj deturnu vin de malbono.

⁸Ĉi tio estos saniga por via korpo, Kaj bona nutro por viaj ostoj.

⁹Faru honoron al la Eternulo el via havo Kaj el la unuavenaĵo de ĉiuj viaj rikoltoj:

¹⁰Tiam viaj grenejoj tute pleniĝos, Kaj viaj vinpremejoj superbordigos moston.

¹¹La instruon de la Eternulo, ho mia filo, ne malŝatu; Kaj ne deturnu vin, kiam Li faras al vi punon;

¹²Ĉar kiun la Eternulo amas, tiun Li punkorektas, Kiel patro la filon, en kiu li havas plezuron.

¹³Feliĉa estas la homo, kiu trovis saĝon, Kaj la homo, kiu akiris prudenton;

¹⁴Ĉar estas pli bone ĝin aĉeti, ol aĉeti arĝenton, Kaj ĝia rikoltaĵo estas pli bona, ol pura oro.

¹⁵Ĝi estas pli kara, ol juveloj; Kaj nenio, kion vi povus deziri, povas esti komparata kun ĝi.

¹⁶Longa vivo estas en ĝia dekstra mano; Riĉo kaj gloro estas en ĝia maldekstra mano.

¹⁷Ĝiaj vojoj estas vojoj agrablaj, Kaj ĉiuj ĝiaj vojetoj estas paco.

¹⁸Ĝi estas arbo de vivo por tiuj, kiuj ĝin ekkaptis; Kaj feliĉaj estas tiuj, kiuj ĝin posedas.

¹⁹La Eternulo per saĝo fondis la teron; Per prudento Li aranĝis la ĉielon.

²⁰Per Lia ĉionsciado disiĝis abismoj; Kaj la nuboj elverŝas roson.

²¹Mia filo! ili ne foriru de viaj okuloj; Konservu klarecon de la kapo kaj prudenton:

²²Ili estos vivo por via animo, Kaj ornamo por via kolo.

²³Tiam vi iros sendanĝere vian vojon, Kaj via piedo ne falpuŝiĝos.

²⁴Kiam vi kuŝiĝos dormi, vi ne timos; Kaj kiam vi kuŝos, via dormo estos agrabla.

²⁵Ne timu subitan teruron, Nek pereigon, kiu povus veni de malbonuloj;

²⁶Ĉar la Eternulo estos via helpo, Kaj gardos vian piedon kontraŭ reto.

²⁷Ne rifuzu bonon al la bezonantoj, Se via mano havas la forton por fari.

²⁸Kiam vi havas ĉe vi, ne diru al via proksimulo: Iru kaj revenu, kaj morgaŭ mi donos.

²⁹Ne pripensu malbonon kontraŭ via proksimulo, Kiam li kun konfido loĝas ĉe vi.

³⁰Ne malpacu kun iu senkaŭze, Se li ne faris al vi malbonon.

³¹Ne enviu rabemulon, Kaj elektu neniun el liaj vojoj;

³²Ĉar la perversulojn la Eternulo abomenas, Kaj Sian intencon Li malkaŝas al la piuloj.

³³Malbeno de la Eternulo estas en la domo de malbonulo, Kaj la loĝejon de piuloj Li benas.

³⁴La mokantojn Li mokas, Kaj al la humiluloj Li donas favoron.

³⁵Honoron heredas saĝuloj; Sed malsaĝuloj forportas honton.