Read La Sankta Biblio esparanto Sentencoj 31 Bible Online

Sentencoj 31 - La Sankta Biblio esparanto bible

Sentencoj 31

¹Vortoj de la reĝo Lemuel, instruo, kiun donis al li lia patrino.

²Ho mia filo, ho filo de mia ventro! Ho filo de miaj promesoj!

³Ne donu al la virinoj vian forton, Nek viajn agojn al la pereigantoj de reĝoj.

⁴Ne al la reĝoj, ho Lemuel, ne al la reĝoj konvenas trinki vinon, Nek al la princoj deziri ebriigaĵojn.

⁵Ĉar drinkinte, ili povas forgesi la leĝojn, Kaj ili malĝustigos la juĝon de ĉiuj prematoj.

⁶Donu ebriigaĵon al la pereanto, Kaj vinon al tiu, kiu havas suferantan animon.

⁷Li trinku, kaj forgesu sian malriĉecon, Kaj li ne plu rememoru sian malfeliĉon.

⁸Malfermu vian buŝon por senvoĉulo, Por la defendo de ĉiuj forlasitaj.

⁹Malfermu vian buŝon, por juĝi juste, Por defendi malriĉulon kaj senhavulon.

¹⁰Se iu trovis kapablan edzinon, Ŝia valoro estas pli granda ol perloj.

¹¹Fidas ŝin la koro de ŝia edzo, Kaj havo ne mankos.

¹²Ŝi redonas al li bonon, sed ne malbonon, En la daŭro de ŝia tuta vivo.

¹³Ŝi serĉas lanon kaj linon, Kaj volonte laboras per siaj manoj.

¹⁴Ŝi estas kiel ŝipo de komercisto; De malproksime ŝi alportas sian panon.

¹⁵Ŝi leviĝas, kiam estas ankoraŭ nokto, Kaj ŝi disdonas manĝon al sia domanaro Kaj porciojn al siaj servantinoj;

¹⁶Ŝi pensas pri kampo, kaj aĉetas ĝin; Per la enspezoj de sia mano ŝi plantas vinberĝardenon.

¹⁷Ŝi zonas siajn lumbojn per forto Kaj fortikigas siajn brakojn.

¹⁸Ŝi komprenas, ke ŝia komercado estas bona; Ŝia lumilo ne estingiĝas en la nokto.

¹⁹Ŝi etendas sian manon al la ŝpinilo, Kaj ŝiaj fingroj tenas la ŝpinturnilon.

²⁰Ŝi malfermas sian manon al la malriĉulo Kaj etendas siajn manojn al la senhavulo.

²¹Ŝi ne timas la neĝon por sia domo, Ĉar ŝia tuta domanaro estas vestita per ruĝa teksaĵo.

²²Ŝi faras al si kovrojn; Delikata tolo kaj purpuro estas ŝiaj vestoj.

²³Ŝia edzo estas konata ĉe la pordego, Kie li sidas kune kun la maljunuloj de la lando.

²⁴Ŝi faras teksaĵon kaj vendas, Kaj zonojn ŝi donas al la komercisto.

²⁵Fortika kaj bela estas ŝia vesto, Kaj ŝi ridas pri la venonta tago.

²⁶Sian buŝon ŝi malfermas kun saĝo; Bonkora instruo estas sur ŝia lango.

²⁷Ŝi kontrolas la iradon de aferoj en sia domo, Kaj ŝi ne manĝas panon en senlaboreco.

²⁸Leviĝas ŝiaj filoj kaj ŝin gratulas; Ŝia edzo ŝin laŭdegas, dirante:

²⁹Multaj filinoj estas bravaj, Sed vi superas ĉiujn.

³⁰Ĉarmeco estas trompa, kaj beleco estas vantaĵo; Virino, kiu timas la Eternulon, estos glorata.

³¹Donu al ŝi laŭ la fruktoj de ŝiaj manoj; Kaj ŝiaj faroj ŝin gloros ĉe la pordegoj.