Read La Sankta Biblio esparanto Sentencoj 9 Bible Online

Sentencoj 9 - La Sankta Biblio esparanto bible

Sentencoj 9

¹La saĝo konstruis sian domon, Ĉarpentis ĝiajn sep kolonojn.

²Ĝi buĉis sian bruton, verŝis sian vinon, Kaj pretigis sian tablon.

³Ĝi sendis siajn servantinojn, Por anonci sur la pintoj de la altaĵoj de la urbo:

⁴Kiu estas naiva, tiu sin turnu ĉi tien! Al la senspritulo ĝi diris:

⁵Venu, manĝu de mia pano, Kaj trinku el la vino, kiun mi enverŝis.

⁶Forlasu la malsaĝaĵon, kaj vivu; Kaj iru laŭ la vojo de la prudento.

⁷Kiu instruas blasfemanton, tiu prenas sur sin malhonoron; Kaj kiu penas ĝustigi malpiulon, tiu estas mokata.

⁸Ne penu ĝustigi blasfemanton, ke li vin ne malamu: Penu ĝustigi saĝulon, kaj li vin amos.

⁹Donu al saĝulo, kaj li ankoraŭ pli saĝiĝos; Instruu justulon, kaj li lernos pli.

¹⁰La komenco de la saĝo estas timo antaŭ la Eternulo; Kaj ekkono pri la Sanktulo estas prudento.

¹¹Ĉar per mi plimultiĝos viaj tagoj, Kaj aldoniĝos al vi jaroj da vivo.

¹²Se vi saĝiĝis, vi saĝiĝis por vi; Kaj se vi blasfemas, vi sola suferos.

¹³Virino malsaĝa, bruema, Sensprita, kaj nenion scianta,

¹⁴Sidas ĉe la pordo de sia domo, Sur seĝo sur altaĵo de la urbo,

¹⁵Por voki la pasantojn, Kiuj iras sian ĝustan vojon:

¹⁶Kiu estas naiva, tiu sin turnu ĉi tien! Kaj al la senspritulo ŝi diris:

¹⁷Akvoj ŝtelitaj estas dolĉaj, Kaj pano kaŝita estas agrabla.

¹⁸Kaj li ne scias, ke tie estas mortintoj Kaj ke ŝiaj invititoj estas en la profundoj de Ŝeol.