Read La Sankta Biblio esparanto Alta Kanto 7 Bible Online

Alta Kanto 7 - La Sankta Biblio esparanto bible

Alta Kanto 7

¹Kiel belaj estas viaj paŝoj en sandaloj, ho filino de princo! La svingado de viaj femuroj estas kiel ĉenringoj, Majstre ellaboritaj.

²Via umbiliko estas kiel ronda pokalo, Al kiu trinkaĵo ne mankas; Via ventro estas kiel amaso da tritiko ĉirkaŭita de rozoj;

³Viaj du mamoj estas kiel du cervidoj, Ĝemeloj de gazelino;

⁴Via kolo estas kiel turo el eburo; Viaj okuloj kiel la lagetoj en Ĥeŝbon, ĉe la pordego de Bat-Rabim; Via nazo estas kiel la turo de Lebanon rigardanta Damaskon;

⁵Via kapo sur vi estas kiel Karmel, Kaj la harbukloj de via kapo kiel la purpura robo de la reĝo, falde kunligita.

⁶Kiel bela kaj kiel ĉarma estas mia amatino inter la plezuroj!

⁷Via staturo similas la palmotrunkon, Kaj viaj mamoj la vinberarojn.

⁸Mi diris: Mi suprengrimpos la palmotrunkon kaj teniĝos je ĝiaj branĉoj; Kaj viaj mamoj estu kiel la penikoj de la vinbertrunko, Kaj la bonodoro de via nazo kiel la bonodoro de citronoj;

⁹Kaj via palato kiel vino bongusta, Kiu englitiĝas ĉarmege kaj glate, Kiu paroligas la lipojn de la dormantoj.

¹⁰Mi apartenas al mia amato, Kaj li sin tiras al mi.

¹¹Venu, mia amato, ni eliru sur la kamparon; Ni enloĝiĝu en la vilaĝoj.

¹²Frumatene ni iru al la vinberĝardenoj; Ni rigardu, ĉu la vinbertrunko jam burĝonis, Ĉu ĝiaj floroj jam malfermiĝis, Ĉu la granatarboj jam floras; Tie mi donos al vi mian amon.

¹³La mandragoroj jam bonodoras, Kaj apud nia enirejo troviĝas delikataj fruktoj ĉiuspecaj, fruaj kaj malfruaj, Kiujn mi provizis por vi, ho mia amato!