Read La Sankta Biblio esparanto Jesaja 3 Bible Online

Jesaja 3 - La Sankta Biblio esparanto bible

Jesaja 3

¹Ĉar jen la Sinjoro, la Eternulo Cebaot, forprenos de Jerusalem kaj de Judujo la apogon kaj forton, ĉian apogon de pano kaj ĉian apogon de akvo;

²heroon kaj militiston, juĝiston kaj profeton, aŭguriston kaj plejaĝulon,

³kvindekestron kaj eminentulon, konsiliston, majstron, kaj lertan sorĉiston.

⁴Kaj junulojn Mi faros iliaj estroj, kaj petoluloj regos ilin.

⁵Kaj premos la popolo ĉiu la alian kaj ĉiu sian proksimulon; junulo estos aroganta kontraŭ maljunulo, kaj senvalorulo antaŭ eminentulo.

⁶Homo ekkaptos sian fraton en la domo de sia patro, dirante: Vi havas veston, estu do nia estro, kaj ĉi tiu ruino estu sub via mano.

⁷Sed ĉi tiu laŭte protestos, dirante: Mi ne volas esti kuracanto; nek panon nek veston mi havas en mia domo; ne faru min estro de la popolo.

⁸Ĉar malfortiĝis Jerusalem, kaj Judujo falis; ĉar iliaj paroloj kaj iliaj faroj estas kontraŭ la Eternulo kaj ofendas la okulojn de Lia majesto.

⁹La signoj de iliaj vizaĝoj atestis kontraŭ ili, kaj sian pekon, simile al la Sodomanoj, ili proklamas, ne kaŝas. Ve al iliaj animoj! ĉar ili mem repagis al si malbonon.

¹⁰Parolu pri la justulo, ke estas bone al li; ĉar ili manĝas la fruktojn de siaj faroj.

¹¹Ve al la malbona malvirtulo! ĉar la faroj de liaj manoj estos repagitaj al li.

¹²Mian popolon premas infanoj, kaj virinoj regas ĝin. Mia popolo! viaj gvidantoj erarigas vin kaj ruinigas la vojon de via irado.

¹³La Eternulo stariĝis, por juĝi; Li staras, por juĝi popolojn.

¹⁴La Eternulo faros juĝan proceson kontraŭ la plejaĝuloj de Lia popolo kaj kontraŭ ĝiaj estroj: Vi ruinigis la vinberĝardenon; havo, kiun vi rabis de malriĉuloj, estas en viaj domoj.

¹⁵Kial vi premas Mian popolon kaj ofendas la malriĉulojn? diras la Sinjoro, la Eternulo Cebaot.

¹⁶Kaj la Eternulo diras: Pro tio, ke la filinoj de Cion fieriĝis, kaj iras kun etendita kolo kaj kun malmodesta rigardo, iras kaj koketas, kaj tintas per ĉenetoj sur la piedoj:

¹⁷la Sinjoro senharigos la verton de la filinoj de Cion, kaj la Eternulo nudigos ilian hontindaĵon.

¹⁸En tiu tago la Sinjoro forigos la ornamon de la ĉenetoj kaj la steletojn kaj la lunetojn,

¹⁹la orelringojn, la ĉenetojn kaj la ĉirkaŭligojn,

²⁰la brilaĵetojn kaj la bukojn kaj la laĉojn kaj la parfumujojn kaj la talismanojn,

²¹la ringojn kaj la nazringojn,

²²la multekostajn vestojn kaj la mantelojn kaj la vualojn kaj la saketojn,

²³la spegulojn kaj la delikatajn ŝtofojn kaj la kapornamojn kaj la kaptukojn.

²⁴Kaj anstataŭ bonodoro estos malbonodoro, kaj anstataŭ zono estos ŝnuro, kaj anstataŭ krispaj haroj estos kalvo, kaj anstataŭ eleganta mantelo estos sako, anstataŭ beleco estos brulmakuloj.

²⁵Viaj viroj falos de glavo, kaj viaj fortuloj en la milito.

²⁶Kaj ĝiaj pordegoj ploros kaj funebros, kaj mizere ĝi sidos sur la tero.