Read La Sankta Biblio esparanto Lamentado 5 Bible Online

Lamentado 5 - La Sankta Biblio esparanto bible

Lamentado 5

¹Rememoru, ho Eternulo, kio fariĝis al ni; Rigardu kaj vidu nian malhonoron!

²Nia heredaĵo transiris al fremduloj, Niaj domoj al aligentuloj.

³Ni fariĝis orfoj senpatraj, Niaj patrinoj estas kiel vidvinoj.

⁴Nian akvon ni trinkas pro mono; Nian lignon ni ricevas nur pro pago.

⁵Oni pelas nin je nia kolo; Ni laciĝis, sed oni ne permesas al ni ripozi.

⁶Al Egiptujo ni etendis la manon, Al Asirio, por satiĝi per pano.

⁷Niaj patroj pekis, sed ili jam ne ekzistas; Kaj ni devas suferi pro iliaj malbonagoj.

⁸Sklavoj regas super ni; Kaj neniu liberigas nin el iliaj manoj.

⁹Kun danĝero por nia vivo ni akiras nian panon, Pro la glavo en la dezerto.

¹⁰Nia haŭto varmegiĝis kiel forno, Por la kruela malsato.

¹¹La virinojn en Cion ili senhonorigis, La virgulinojn en la urboj de Judujo.

¹²La princoj estas pendigitaj je siaj manoj; La maljunulojn oni ne respektis.

¹³La junuloj devas porti muelŝtonojn; La knaboj falas sub la lignoŝarĝoj.

¹⁴La maljunuloj jam ne sidas ĉe la pordegoj, La junuloj jam ne kantas.

¹⁵Malaperis la gajeco de nia koro; Niaj dancrondoj aliformiĝis en funebron.

¹⁶Defalis la krono de nia kapo; Ho ve al ni, ke ni pekis!

¹⁷Pro tio senfortiĝis nia koro, Pro tio senlumiĝis niaj okuloj:

¹⁸Pro la monto Cion, ke ĝi fariĝis dezerta, Ke vulpoj vagas sur ĝi.

¹⁹Sed Vi, ho Eternulo, kiu restas eterne Kaj kies trono staras de generacio al generacio,

²⁰Kial Vi forgesis nin kvazaŭ por eterne, Forlasis nin por longa tempo?

²¹Reirigu nin, ho Eternulo, al Vi, ke ni revenu; Renovigu niajn tagojn kiel en la tempo antaŭa.

²²Ĉar ĉu Vi nin tute forpuŝis? Vi tre forte ekkoleris kontraŭ ni.