Read La Sankta Biblio esparanto Marko 3 Bible Online

Marko 3 - La Sankta Biblio esparanto bible

Marko 3

¹Kaj denove li eniris en la sinagogon, kaj tie estis viro, havanta manon velkintan.

²Kaj oni observis lin, ĉu en la sabato li lin sanigos, por ke ili povu lin akuzi.

³Kaj li diris al la viro, kiu havis la velkintan manon: Stariĝu en la mezo.

⁴Kaj li diris al ili: Ĉu estas permesate bonfari en sabato, aŭ malbonfari? savi vivon, aŭ mortigi? Sed ili silentis.

⁵Kaj kiam kun kolero li ĉirkaŭrigardis ilin, ĉagrenite pro la obstiniĝo de ilia koro, li diris al la viro: Etendu vian manon. Kaj li etendis ĝin, kaj lia mano resaniĝis.

⁶Kaj la Fariseoj eliris, kaj tuj konsiliĝis kun la Herodanoj kontraŭ li, kiamaniere lin pereigi.

⁷Kaj Jesuo kun siaj disĉiploj foriris ĝis la maro; kaj granda homamaso el Galileo sekvis lin. Kaj el Judujo

⁸kaj el Jerusalem kaj el Edom kaj el Transjordano kaj el ĉirkaŭ Tiro kaj Cidon, grandnombra homamaso, aŭdinte ĉion, kion li faris, venis al li.

⁹Kaj li diris al siaj disĉiploj, ke malgranda ŝipeto estu je lia dispono, pro la homamaso, por ke oni ne premu lin;

¹⁰ĉar multajn li jam sanigis, tiel ke ĉiuj, kiuj havis malsanojn, premadis sur lin, por tuŝi lin.

¹¹Kaj malpuraj spiritoj, tuj kiam ili vidis lin, falis antaŭ li, kaj kriis, dirante: Vi estas la Filo de Dio.

¹²Kaj li severe admonis ilin, ke ili ne konatigu lin.

¹³Kaj li supreniris sur la monton, kaj alvokis tiujn, kiujn li mem volis; kaj ili venis al li.

¹⁴Kaj li elektis dek du, kiujn ankaŭ li nomis apostoloj, por ke ili estu kun li, kaj por ke li dissendu ilin por prediki,

¹⁵kaj por havi aŭtoritaton elpeli demonojn:

¹⁶kaj Simonon li alnomis Petro;

¹⁷kaj Jakobon, filon de Zebedeo, kaj Johanon, fraton de Jakobo, kaj tiujn li alnomis Boanerges, tio estas, Filoj de tondro;

¹⁸kaj Andreon kaj Filipon kaj Bartolomeon kaj Mateon kaj Tomason, kaj Jakobon, filon de Alfeo, kaj Tadeon, kaj Simonon, la Fervorulon,

¹⁹kaj Judason Iskariotan, kiu ankaŭ perfidis lin. Kaj li venis en domon.

²⁰Kaj denove la homamaso kunvenis tiel, ke ili ne povis eĉ manĝi panon.

²¹Kaj liaj amikoj, aŭdinte tion, eliris, por kapti lin, ĉar ili diris: Li frenezas.

²²Kaj la skribistoj, kiuj alvenis el Jerusalem, diris: Li havas Baal- Zebubon; per la estro de la demonoj li elpelas la demonojn.

²³Kaj li alvokis ilin, kaj parolis al ili parabole: Kiel povas Satano elpeli Satanon?

²⁴Kaj se regno estas dividita kontraŭ si, tiu regno ne povas stari.

²⁵Kaj se domo estas dividita kontraŭ si, tiu domo ne povas stari.

²⁶Kaj se Satano ribelis kontraŭ si kaj estas dividita, li ne povas stari, sed havas finon.

²⁷Sed neniu povas eniri en la domon de la fortulo kaj trarabi liajn posedaĵojn, se unue li ne ligos la fortulon, kaj poste li trarabos lian domon.

²⁸Vere mi diras al vi: Ĉiuj iliaj pekoj estos pardonitaj al la filoj de homoj, kaj iliaj blasfemoj, per kiuj ajn ili blasfemos;

²⁹sed iu, kiu blasfemos kontraŭ la Sankta Spirito, eterne ne havos pardonon, sed estas kulpa pri eterna peko;

³⁰ĉar oni diris: Li havas malpuran spiriton.

³¹Kaj jen alvenis lia patrino kaj liaj fratoj, kaj starante ekstere, ili sendis al li, vokante lin.

³²Kaj homamaso sidis ĉirkaŭ li; kaj oni diris al li: Jen via patrino kaj viaj fratoj ekstere vin serĉas.

³³Kaj li respondis al ili, dirante: Kiuj estas mia patrino kaj miaj fratoj?

³⁴Kaj ĉirkaŭrigardante tiujn, kiuj ronde ĉirkaŭ li sidis, li diris: Jen mia patrino kaj miaj fratoj!

³⁵Ĉar kiu ajn faros la volon de Dio, tiu estas mia frato kaj mia fratino kaj mia patrino.