Read La Sankta Biblio esparanto Romanoj 12 Bible Online

Romanoj 12 - La Sankta Biblio esparanto bible

Romanoj 12

¹Mi do vin petas, fratoj, pro la kompatoj de Dio, ke vi prezentu viajn korpojn kiel vivantan oferon, sanktan, plaĉantan al Dio, kio estas via racia servo.

²Kaj ne konformiĝu al ĉi tiu mondo; sed aliformiĝu per renovigado de via menso, por ke vi provu, kio estas la bona kaj aprobinda kaj perfekta volo de Dio.

³Ĉar mi diras al ĉiu el vi, per la graco al mi donita, ke li ne tro estimu sin, sed estimu sin kun modereco, laŭ mezuro de la fido, kiun Dio disdonis al ĉiu.

⁴Ĉar kiel ni havas multajn membrojn en unu korpo, kaj ne ĉiuj membroj havas la saman funkcion,

⁵tiel same ni multaj estas unu korpo en Kristo, kaj ĉiuj aparte membroj unu de alia.

⁶Sed havante donacojn diversajn laŭ la graco donita al ni, ĉu profetadon, ni profetu laŭ la mezuro de nia fido;

⁷aŭ servadon, ni laboru en nia servado; aŭ instruanto, en sia instruado;

⁸aŭ admonanto, en sia admonado; la disdonanto agu malavare, la administranto kun diligenteco, la kompatanto kun ĝojo.

⁹Via amo estu sen hipokriteco. Abomenu tion, kio estas malbona; algluiĝu al la bona.

¹⁰En fratamo estu kore unuigitaj unu al alia, honore preferantaj unu la alian;

¹¹en diligenteco ne malviglaj, en spirito fervoraj, servantaj la Sinjoron;

¹²en espero ĝojaj, en aflikto paciencaj, en preĝado persistaj;

¹³kotizantaj por la bezonoj de la sanktuloj, sekvantaj gastamecon.

¹⁴Benu tiujn, kiuj vin persekutas; benu, kaj ne malbenu.

¹⁵Ĝoju kun ĝojantoj, ploru kun plorantoj.

¹⁶Estu simpatiaj unu al alia. Ne pripensadu altajn aferojn, sed klinadu vin al humilaj aferoj. Ne opiniu vin saĝaj.

¹⁷Redonu al neniu malbonon pro malbono. Celu aprobindaĵojn antaŭ ĉiuj homoj.

¹⁸Se estos eble, restu pacaj viaparte kun ĉiuj homoj.

¹⁹Ne venĝu vin, amataj, sed cedu lokon al kolero; ĉar estas skribite: Ĉe Mi estas venĝo, Mi repagos, diras la Sinjoro.

²⁰Sed se via malamiko malsatas, donu al li manĝi; se li soifas, donu al li trinki; ĉar tion farante, fajrajn karbojn vi kolektos sur lia kapo.

²¹Ne venkiĝu de malbono, sed venku malbonon per bono.