Read La Sankta Biblio esparanto Romanoj 6 Bible Online

Romanoj 6 - La Sankta Biblio esparanto bible

Romanoj 6

¹Kion do ni diru? Ĉu ni restu en peko, por ke graco abundu?

²Nepre ne! Ĉu ni, kiuj mortis al peko, ankoraŭ vivus en ĝi?

³Ĉu vi ne scias, ke ni ĉiuj, kiuj baptiĝis al Jesuo Kristo, baptiĝis al lia morto?

⁴Ni do estas entombigitaj kun li per bapto al morto, por ke, kiel Kristo estas levita el la mortintoj per la gloro de la Patro, tiel same ni ankaŭ iradu en noveco de vivo.

⁵Ĉar se ni jam kuniĝis al la simileco de lia morto, ni tiel same kuniĝos al la simileco de lia releviĝo,

⁶sciante, ke nia malnova homo estas kun li krucumita, por ke la korpo de peko estu neniigita, por ke ni jam ne estu sklavoj al peko;

⁷ĉar tiu, kiu mortis, estas pravigita pri peko.

⁸Sed se ni mortis kun Kristo, ni kredas, ke ni ankaŭ vivos kun li;

⁹sciante, ke Kristo, levite el la mortintoj, ne plu mortas; la morto ne plu lin regas.

¹⁰Ĉar mortante, li mortis al peko unufoje por ĉiam; sed vivante, li vivas al Dio.

¹¹Tial ankaŭ vi vin kalkulu mortintoj al peko, sed vivantoj al Dio en Kristo Jesuo.

¹²Tial peko ne reĝu en via morta korpo tiel, ke vi obeu al ĝiaj deziroj;

¹³ankaŭ ne prezentu viajn membrojn iloj de maljusteco al peko, sed prezentu vin al Dio vivantoj el la mortintoj, kaj viajn membrojn iloj de justeco por Dio.

¹⁴Ĉar peko ne regos vin, ĉar vi estas ne sub la leĝo, sed sub graco.

¹⁵Kio do? ĉu ni peku, pro tio, ke ni estas ne sub leĝo, sed sub graco? Nepre ne!

¹⁶Ĉu vi ne scias, ke kiam vi vin prezentas, kiel sklavoj al iu por obeado, vi estas sklavoj de tiu, al kiu vi obeas, ĉu de peko por morto, aŭ de obeemeco por justeco?

¹⁷Sed danko estu al Dio, ke kvankam vi estis la sklavoj de peko, vi tamen fariĝis kore obeemaj al tiu tipo de instruado, al kiu vi estas kondukitaj;

¹⁸kaj liberigite el peko, vi sklaviĝis al justeco.

¹⁹Mi parolas home pro la malforteco de via karno; ĉar kiel vi prezentis viajn membrojn sklavoj al malpureco kaj al maljusteco ĝis maljusteco, tiel nun prezentu viajn membrojn sklavoj al justeco ĝis sanktigo.

²⁰Ĉar kiam vi estis sklavoj de peko, vi estis liberaj de justeco.

²¹Kian frukton do vi havis tiam el tio, pri kio vi nun hontas? ĉar la fino de tio estas morto.

²²Sed nun, liberigite el peko, kaj sklaviĝinte al Dio, vi havas vian frukton ĝis sanktiĝo, kaj por fino eternan vivon.

²³Ĉar la salajro de peko estas morto; sed la donaco de Dio estas eterna vivo en Kristo Jesuo, nia Sinjoro.