Read La Sankta Biblio esparanto Galatoj 5 Bible Online

Galatoj 5 - La Sankta Biblio esparanto bible

Galatoj 5

¹Por libereco Kristo nin liberigis; tial staru fortike, kaj ne reimplikiĝu en jugon de sklaveco.

²Jen mi, Paŭlo, diras al vi, ke, se vi cirkumcidiĝos, Kristo al vi tute ne utilos.

³Mi denove atestas al ĉiu homo cirkumcidata, ke li estas ŝuldanto, por plenumi la tutan leĝon.

⁴Vi, kiuj volas vin pravigi per la leĝo, apartiĝis for de Kristo; vi forfalis de graco.

⁵Ĉar ni en la Spirito atendas la esperon de justeco per la fido.

⁶Ĉar en Kristo Jesuo nek cirkumcido nek necirkumcido valoras ion, sed nur fido, energianta per amo.

⁷Vi bone kuradis; kiu vin malhelpis, ke vi ne obeu la veron?

⁸Ĉi tiu influo ne venas de tiu, kiu vin vokas.

⁹Malmulto da fermentaĵo fermentigas la tutan mason.

¹⁰Mi fidas pri vi en la Sinjoro, ke vi ne alie sentados; sed tiu, kiu malkvietigas vin, elportos sian propran juĝon, kiu ajn li estas.

¹¹Sed mi, fratoj, se mi ankoraŭ predikas cirkumcidon, kial mi estas ankoraŭ persekutata? tiuokaze la falpuŝilo de la kruco estas formovita.

¹²Mi volus, ke tiuj, kiuj vin maltrankviligas, sin fortranĉu.

¹³Ĉar vi, fratoj, estas vokitaj al libereco; tamen ne uzu vian liberecon kiel pretekston por la karno, sed per amo servu unu la alian.

¹⁴Ĉar la tuta leĝo estas plenumata en unu diro, jene: Amu vian proksimulon kiel vin mem.

¹⁵Sed se vi mordas kaj manĝegas unu la alian, gardu vin, ke vi ne estu detruitaj unu de la alia.

¹⁶Sed mi diras: Iradu laŭ la Spirito, kaj la deziregon de la karno vi ne plenumos.

¹⁷Ĉar la karno deziregas kontraŭ la Spirito, kaj la Spirito kontraŭ la karno; ĉar ĉi ĉiuj interbatalas reciproke, por ke vi ne faru tion, kion vi volas.

¹⁸Sed se vi estas kondukataj de la Sinjoro, vi jam ne estas sub la leĝo.

¹⁹Evidentaj estas la faroj de la karno, kiuj estas malĉasteco, malpureco, voluptemo,

²⁰idolkulto, sorĉado, malamikeco, malpaco, ĵaluzoj, koleregoj, partiemeco, skismoj, herezoj,

²¹envioj, ebrieco, diboĉado, kaj aliaj similaj; pri kiuj mi avertas vin, kiel mi jam antaŭe admonis vin, ke tiuj, kiuj tion faradas, ne heredos la regnon de Dio.

²²Sed la frukto de la Spirito estas amo, ĝojo, paco, pacienco, komplezo, bonkoreco, fideleco,

²³mildeco, sinregado; kontraŭ tiaj ne ekzistas leĝo.

²⁴Kaj tiuj, kiuj apartenas al Kristo Jesuo, jam krucumis la karnon kun ĝiaj pasioj kaj voluptoj.

²⁵Se ni vivas per la Spirito, en la Spirito ni ankaŭ iradu.

²⁶Ni ne fariĝu fanfaronemaj, incitante kaj enviante unu la alian.