Read La Sankta Biblio esparanto Efesanoj 3 Bible Online

Efesanoj 3 - La Sankta Biblio esparanto bible

Efesanoj 3

¹Pro tio mi, Paŭlo, malliberulo de Kristo Jesuo por vi nacianoj,

²se vi aŭdis pri la dispono de tiu graco de Dio, kiu estas donita al mi por vi,

³ke per malkaŝo la mistero estas sciigita al mi, kiel mi jam antaŭe mallonge skribis,

⁴per kio vi povas rimarki, dum vi legas, mian komprenon en la mistero de Kristo,

⁵kiu en aliaj generacioj ne estis sciigita al la homidoj, kiel ĝi nun malkaŝiĝis al liaj sanktaj apostoloj kaj profetoj en la Spirito,

⁶ke la nacianoj estas kunheredantoj, kaj samkorpanoj, kaj partoprenantoj en la promeso en Kristo Jesuo per la evangelio,

⁷al kiu mi fariĝis servanto laŭ la dono de la graco de Dio, donita al mi laŭ la energio de Lia potenco.

⁸Al mi, kiu estas malpli ol la malplej granda el ĉiuj sanktuloj, ĉi tiu graco estas donita, por ke mi prediku inter la nacioj la neesploreblan riĉon de Kristo;

⁹kaj por ke mi klarigu al ĉiuj, kia estas la dispono de la mistero kaŝita tra ĉiuj mondaĝoj en Dio, kiu kreis ĉion;

¹⁰por ke nun konatiĝu al la regantoj kaj aŭtoritatoj en la ĉielejoj, per la eklezio, la multobla saĝeco de Dio,

¹¹laŭ la eterna decido, kiun Li faris en Kristo Jesuo, nia Sinjoro;

¹²en kiu ni havas kuraĝon kaj alkondukon en fidado per nia fido al li.

¹³Pro tio mi petas, ke vi ne senfortiĝu pro miaj suferoj por vi, kiuj estas via gloro.

¹⁴Pro tio mi fleksas miajn genuojn antaŭ la Patro,

¹⁵el kiu ĉiu familio, en la ĉielo kaj sur la tero, estas nomata,

¹⁶por ke Li donu al vi, laŭ la riĉo de Sia gloro, ke vi estu potence fortigitaj en la interna homo, per Lia Spirito;

¹⁷por ke Kristo loĝu per fido en viaj koroj; tiel, ke vi, enradikigite kaj bazite en amo,

¹⁸kapabliĝu kun ĉiuj sanktuloj kompreni, kio estas la larĝeco kaj longeco kaj alteco kaj profundeco,

¹⁹kaj scii la amon de Kristo, kiu superas scion, por ke vi pleniĝu eĉ ĝis la pleneco de Dio.

²⁰Nun al Tiu, kiu povas tre abunde fari, super ĉio, kion ni povas peti aŭ pensi, laŭ la potenco, kiu energias en ni,

²¹estu gloro en la eklezio kaj en Kristo Jesuo ĝis ĉiuj generacioj por ĉiam kaj eterne. Amen.