Read La Sankta Biblio esparanto Efesanoj 5 Bible Online

Efesanoj 5 - La Sankta Biblio esparanto bible

Efesanoj 5

¹Estu do imitantoj de Dio, kiel infanoj amataj;

²kaj iradu en amo, kiel Kristo nin amis kaj sin donis pro ni, donaĵon kaj oferaĵon al Dio por agrabla odoraĵo.

³Sed malĉasteco kaj ĉia malpureco kaj avideco ne eĉ estu nomataj inter vi, kiel decas por sanktuloj;

⁴nek ia hontindaĵo, nek sensenca parolado, nek tro libera babilado, kiuj ne konvenas; sed prefere dankesprimo.

⁵Ĉar vi ja scias, ke ĉiu malĉastulo kaj malpurulo kaj avidulo, kiu estas idolano, havas nenian heredon en la regno de Kristo kaj Dio.

⁶Neniu vin trompu per vantaj vortoj; ĉar pro tiuj aferoj venas sur la infanojn de malobeo la kolero de Dio.

⁷Ne estu do partoprenantoj kun ili;

⁸ĉar iam vi estis mallumo, sed jam vi estas lumo en la Sinjoro; iru kiel infanoj de lumo

⁹(ĉar la frukto de la lumo estas en ĉia boneco kaj justeco kaj vero),

¹⁰provante, kio bone plaĉas al la Sinjoro;

¹¹kaj ne partoprenu kun la senfruktaj faroj de mallumo, sed prefere refutu ilin;

¹²ĉar estas hontinde eĉ paroli pri tio, kion ili faras sekrete.

¹³Sed ĉio, kio estas refutata, estas elmontrata per la lumo, ĉar ĉio elmontrata estas lumo.

¹⁴Tial estas dirite: Vekiĝu, dormanto, kaj releviĝu el la mortintoj, kaj Kristo al vi lumos.

¹⁵Zorgu do, ke vi atente iradu, ne kiel malsaĝaj, sed kiel saĝaj;

¹⁶elaĉetante la tempon, ĉar malbonaj estas la tagoj.

¹⁷Ne estu do senprudentaj, sed komprenu, kio estas la volo de la Sinjoro.

¹⁸Kaj ne ebriiĝu per vino, en kio estas diboĉo, sed pleniĝu per la Spirito;

¹⁹parolante unu al alia per psalmoj kaj himnoj kaj kantoj spiritaj, kantante kaj psalmante en viaj koroj al la Sinjoro,

²⁰dankante Dion, la Patron, ĉiam pro ĉio en la nomo de nia Sinjoro Jesuo Kristo;

²¹submetiĝante unu al alia en la timo al Kristo.

²²Edzinoj, submetiĝu al viaj edzoj tiel same, kiel al la Sinjoro.

²³Ĉar edzo estas kapo de edzino, kiel ankaŭ Kristo estas kapo de la eklezio; kaj li estas la savanto de la korpo.

²⁴Sed kiel la eklezio sin submetas al Kristo, tiel ankaŭ edzinoj al edzoj en ĉio.

²⁵Edzoj, amu viajn edzinojn, kiel Kristo amis la eklezion kaj pro ĝi sin donis,

²⁶por ke li sanktigu ĝin per akvolavo, kun la vorto,

²⁷por ke li starigu ĝin antaŭ si glora eklezio, ne havanta makulon, nek malglataĵon, nek ion tian, sed por ke ĝi estu sankta kaj sendifekta.

²⁸Tiel same devas edzoj ami siajn edzinojn kiel siajn proprajn korpojn. Kiu amas sian edzinon, tiu amas sin mem;

²⁹ĉar oni neniam malamas sian propran karnon, sed nutras kaj prizorgas ĝin, kiel ankaŭ la Sinjoro la eklezion;

³⁰ĉar ni estas membroj de lia korpo.

³¹Tial viro forlasos sian patron kaj sian patrinon, kaj aliĝos al sia edzino, kaj ili du estos unu karno.

³²Ĉi tiu mistero estas granda, sed mi parolas pri Kristo kaj la eklezio.

³³Tamen ankaŭ ĉiu el vi individue amu sian edzinon, kiel sin mem; kaj la edzino timu sian edzon.