Read La Sankta Biblio esparanto 1 Tesalonikanoj 5 Bible Online

1 Tesalonikanoj 5 - La Sankta Biblio esparanto bible

1 Tesalonikanoj 5

¹Sed pri la tempoj kaj okazoj, fratoj, vi ne bezonas, ke oni skribu al vi.

²Ĉar vi mem tute bone scias, ke la tago de la Sinjoro venas, kiel ŝtelisto en la nokto.

³Dum oni diras: Paco kaj sendanĝereco, tiam subita detruo venas sur ilin, kiel naskodoloro al gravedulino, kaj ili tute ne forsaviĝos.

⁴Sed vi, fratoj, ne estas en mallumo tiel, ke tiu tago vin trafus kiel ŝtelisto;

⁵ĉar vi ĉiuj estas filoj de lumo kaj filoj de la tago; ni ne estas el la nokto, nek el mallumo;

⁶tial ni ne dormu, kiel la ceteraj, sed ni viglu kaj estu sobraj.

⁷Ĉar kiuj dormas, tiuj dormas en la nokto; kaj kiuj ebriiĝas, tiuj ebriiĝas en la nokto.

⁸Sed ĉar ni estas el la tago, ni estu sobraj, surmetante la kirason de fido kaj amo, kaj, kiel kaskon, la esperon de savo.

⁹Ĉar Dio nin destinis ne al kolero, sed al la ricevo de savado per nia Sinjoro Jesuo Kristo,

¹⁰kiu mortis por ni, por ke ni vivu kune kun li, ĉu ni maldormos aŭ dormos.

¹¹Tial admonu vin reciproke kaj edifu unu la alian, kiel ankaŭ vi jam faradas.

¹²Sed ni petegas vin, fratoj, koni tiujn, kiuj laboras ĉe vi kaj estras ĉe vi en la Sinjoro kaj vin admonas,

¹³kaj estimi ilin treege kun amo pro ilia laboro. Estu pacemaj unu kun la alia.

¹⁴Kaj ni petas vin, fratoj, admonu la senordulojn, kuraĝigu la nebravulojn, subtenu la malfortulojn, estu paciencaj kontraŭ ĉiuj.

¹⁵Zorgu, ke neniu redonu al iu malbonon por malbono; sed ĉiam sekvu tion, kio estas bona, unu por alia kaj por ĉiuj.

¹⁶Ĝoju ĉiam;

¹⁷preĝu senĉese;

¹⁸pri ĉio donu dankon; ĉar tia estas la volo de Dio en Kristo Jesuo pri vi.

¹⁹Ne estingu la Spiriton;

²⁰ne malestimu profetaĵojn;

²¹elprovu ĉion; tenu firme tion, kio estas bona;

²²detenu vin de ĉia formo de malbono.

²³Kaj la Dio de paco vin sanktigu tute; kaj via spirito kaj animo kaj korpo estu plene konservitaj sen kulpo, ĉe la alveno de nia Sinjoro Jesuo Kristo.

²⁴Fidela estas Tiu, kiu vin vokas, kiu ankaŭ faros.

²⁵Fratoj, preĝu por ni.

²⁶Salutu ĉiujn fratojn per sankta kiso.

²⁷Mi solene petegas vin per la Sinjoro, ke oni legu ĉi tiun epistolon antaŭ la tuta frataro.

²⁸La graco de nia Sinjoro Jesuo Kristo estu kun vi.