Read La Sankta Biblio esparanto 1 Timoteo 3 Bible Online

1 Timoteo 3 - La Sankta Biblio esparanto bible

1 Timoteo 3

¹Fidinda estas la diro: Se iu celas episkopecon, tiu deziras bonan laboron.

²Episkopo do devas esti neriproĉebla, edzo de unu edzino, sobra, moderema, ordema, gastama, instruema,

³ne vindrinkema, ne batema; sed mildanima, ne disputema, ne monamanto;

⁴reganta bone sian propran domanaron, tenante siajn gefilojn sub regado kun ĉia seriozeco

⁵(sed se iu ne scias regi sian propran domon, kiel li zorgos pri la eklezio de Dio?);

⁶ne novico, por ke li ne ŝvelu per fiereco kaj ne falu en la kondamnon de la diablo.

⁷Krom tio li devas havi bonan ateston de la eksteruloj, por ke li ne falu en riproĉon kaj kaptilon de la diablo.

⁸Tiel same diakonoj devas esti seriozaj, ne duflanke parolantaj, ne tro amantaj vinon, ne avidantaj malhonoran gajnon;

⁹tenantaj la misteron de la fido en pura konscienco.

¹⁰Kaj tiuj ankaŭ estu unue provitaj; poste ili servu kiel diakonoj, se ili estos neriproĉeblaj.

¹¹Virinoj ankaŭ devas esti seriozaj, ne kalumniantoj, sobraj, fidelaj pri ĉio.

¹²La diakonoj estu edzoj de po unu edzino, regantaj bone siajn gefilojn kaj siajn proprajn domojn.

¹³Ĉar tiuj, kiuj bone servadis kiel diakonoj, akiras al si bonan gradon kaj grandan kuraĝon en la fido, kiu estas en Kristo Jesuo.

¹⁴Ĉi tion mi skribas al vi, esperante veni al vi baldaŭ,

¹⁵sed se mi prokrastos, por ke vi komprenu, kiel oni devas konduti en la domo de Dio, kiu estas la eklezio de la vivanta Dio, la kolono kaj bazo de la vero.

¹⁶Kaj laŭ konsento, granda estas la mistero de pieco: Tiu, kiu elmontriĝis en la karno, praviĝis en la spirito, estis vidita de anĝeloj, pripredikita ĉe la nacioj, prikredita en la mondo, prenita supren en gloro.