Read La Sankta Biblio esparanto 2 Timoteo 2 Bible Online

2 Timoteo 2 - La Sankta Biblio esparanto bible

2 Timoteo 2

¹Vi do, mia filo, fortikiĝu en la graco, kiu estas en Kristo Jesuo.

²Kaj kion vi de mi aŭdis inter multaj atestantoj, tion transdonu al fidelaj homoj, kompetentaj instrui ankaŭ aliajn.

³Vi do elportu suferojn, kiel bona militisto de Jesuo Kristo.

⁴Neniu militanto sin implikas en la aferojn de ĉi tiu vivo; por ke li plaĉu al sia varbinto.

⁵Kaj se iu konkuras kiel atleto, li ne estas kronata, se li ne laŭregule konkuris.

⁶La laboranta terkultivisto devas la unua partopreni en la fruktoj.

⁷Konsideru tion, kion mi diras; ĉar la Sinjoro donos al vi komprenon pri ĉio.

⁸Memoru Jesuon Kriston, levitan el la mortintoj, el la idaro de David, laŭ mia evangelio;

⁹en ĝi mi elportas suferadon ĝis ligiloj, kiel krimulo, sed la vorto de Dio ne estas ligita.

¹⁰Tial mi suferas ĉion pro la elektitoj, por ke ili ankaŭ atingu la en Kristo Jesuo savon kun gloro eterna.

¹¹Fidinda estas la diro: Ĉar se ni mortis kun li, ni ankaŭ vivos kun li;

¹²se ni suferas, ni ankaŭ reĝos kun li; se ni malkonfesos lin, li ankaŭ nin malkonfesos;

¹³se ni malfidas, li restas fidela; ĉar li ne povas malkonfesi sin mem.

¹⁴Memorigu ilin pri tio, admonante ilin antaŭ la Sinjoro, ke ili ne vortobatalu, kio estas neniel utila, kun risko de ŝancelo por la aŭdantoj.

¹⁵Klopodu prezenti vin ĉe Dio kiel aprobita, laboranto senriproĉa, ĝuste pritaksante la vorton de la vero.

¹⁶Sed evitu profanajn babiladojn; ĉar ili iros antaŭen al pli multe da malpieco,

¹⁷kaj ilia parolo dismordos kiel gangreno; el kiuj estas Himeneo kaj Fileto,

¹⁸kiuj pri la vero eraris, dirante, ke la releviĝo estas jam pasinta; kaj ili renversas la fidon de kelkaj.

¹⁹Tamen la firma fundamento de Dio staras, havante la jenan sigelon: La Sinjoro konas tiujn, kiuj estas liaj, kaj: Foriru de maljusteco ĉiu, kiu nomas la nomon de la Sinjoro.

²⁰Sed en granda domo estas vazoj ne nur oraj kaj arĝentaj, sed ankaŭ lignaj kaj argilaj, kaj unuj por honoro kaj aliaj por malhonoro.

²¹Se do iu purigos sin de ĉi tiuj, li estos vazo por honoro, sanktigita, taŭga por la mastro, pretigita por ĉiu bona laboro.

²²Sed forkuru de junulaj voluptoj, kaj sekvu justecon, fidon, amon, pacon, kune kun tiuj, kiuj vokas la Sinjoron el pura koro.

²³Sed malsaĝajn kaj neklerajn demandojn evitu, sciante, ke ili naskas malpacojn.

²⁴Kaj la servisto de la Sinjoro devas ne malpaci, sed esti afabla al ĉiuj, instruema, tolerema,

²⁵en humileco instruante tiujn, kiuj kontraŭstaras; eble Dio donos al ili penton, por ke ili venu al scio de la vero,

²⁶kaj por ke ili sobraj eliĝu el la kaptilo de la diablo, kaptite de li, por plenumi lian volon.