Read La Sankta Biblio esparanto Hebreoj 3 Bible Online

Hebreoj 3 - La Sankta Biblio esparanto bible

Hebreoj 3

¹Tial, fratoj sanktaj, partoprenantaj en ĉiela voko, pripensu la Apostolon kaj Ĉefpastron de nia konfeso, Jesuon,

²kiu estis fidela al Tiu, kiu nomis lin kiel ankaŭ Moseo en Lia domo.

³Ĉar ĉi tiu estas rigardita kiel inda je tiom pli granda gloro ol Moseo, kiom pli grandan honoron, ol la domo, havas ĝia stariginto.

⁴Ĉar ĉiu domo estas starigita de iu; sed la stariginto de ĉio estas Dio.

⁵Kaj Moseo ja estis fidela en Lia tuta domo, kiel servanto, por atestaĵo pri tio, kio estis parolota;

⁶sed Kristo, kiel filo super Lia domo; kies domo ni estas, se ni tenos nian kuraĝon kaj la ĝojadon de nia espero firmaj ĝis la fino.

⁷Tial, kiel diras la Sankta Spirito: Hodiaŭ, se vi aŭskultas Lian voĉon,

⁸Ne obstinigu vian koron, kiel en la indignigo, Kiel en la tago de la tento en la dezerto,

⁹Kiam viaj patroj Min incitis, Esploris kaj vidis Miajn farojn kvardek jarojn.

¹⁰Pro tio Mi indignis kontraŭ tiu generacio, Kaj Mi diris: Ili ĉiam estas kun koro malĝusta, Kaj ili ne volas koni Miajn vojojn;

¹¹Tial Mi ĵuris en Mia kolero, Ke ili ne venos en Mian ripozejon.

¹²Gardu vin, fratoj, ke ne estu en iu el vi koro malbona de nekredemo, en defalo de la vivanta Dio;

¹³sed konsilu unu la alian ĉiutage, dum estas nomate hodiaŭ, por ke neniu el vi estu obstinigita per la trompeco de peko;

¹⁴ĉar ni fariĝis partoprenantoj en Kristo, se la komencon de nia certiĝo ni tenos firma ĝis la fino;

¹⁵dum estas dirite: Hodiaŭ, se vi aŭskultas Lian voĉon, Ne obstinigu vian koron, kiel en la indignigo.

¹⁶Ĉar kiuj, aŭskultinte, indignigis? ĉu ne ĉiuj elirintoj el Egiptujo per Moseo?

¹⁷Kaj kontraŭ kiuj Li indignis kvardek jarojn? ĉu ne kontraŭ la pekintoj, kies korpoj falis en la dezerto?

¹⁸Kaj al kiuj Li ĵuris, ke ili ne venos en Lian ripozejon, krom al la neobeantoj?

¹⁹Kaj ni vidas, ke ili pro nekredemo ne povis enveni.