Read La Sankta Biblio esparanto Jakobo 3 Bible Online

Jakobo 3 - La Sankta Biblio esparanto bible

Jakobo 3

¹Ne estu multaj instruistoj, miaj fratoj, sciante, ke ni ricevos pli severan juĝon.

²Ĉar multokaze ni ĉiuj falpuŝiĝas. Se iu ne falpuŝiĝas parole, tiu estas perfekta homo, kapabla bridi ankaŭ la tutan korpon.

³Se ni al la ĉevaloj enmetas la bridojn en la buŝojn, por ke ili obeu al ni, ni ankaŭ ĉirkaŭturnas ilian tutan korpon.

⁴Jen ankaŭ la ŝipoj, kiuj, kvankam ili estas tiel grandaj kaj estas kurepelataj de fortaj ventoj, tamen per tre malgranda direktilo turniĝadas, kien ajn la volo de la direktilisto decidas.

⁵Tiel ankaŭ la lango estas malgranda membro, kaj fanfaronas grandaĵojn. Jen, kiel grandan arbaron ekbruligas fajrero!

⁶Kaj la lango estas fajro; mondo da maljusteco inter niaj membroj estas la lango, kiu malpurigas la tutan korpon kaj ekbruligas la radon de la naturo kaj estas ekbruligita de Gehena.

⁷Ĉar ĉiun specon de bestoj kaj birdoj, de rampaĵoj kaj enmaraĵoj la homa raso al si subigas kaj subigis;

⁸sed la langon neniu povas subigi; ĝi estas malkvieta malbono, plena de mortiga veneno.

⁹Per ĝi ni benas la Sinjoron kaj Patron; kaj per ĝi ni malbenas homojn, faritajn laŭ la bildo de Dio;

¹⁰el la sama buŝo eliras beno kaj malbeno. Miaj fratoj, tio devus ne tiel esti.

¹¹Ĉu la fonto elŝprucigas el la sama aperturo dolĉan akvon kaj maldolĉan?

¹²ĉu figarbo, miaj fratoj, povas doni olivojn, aŭ vinberarbo figojn? kaj sala akvo ne donas dolĉaĵon.

¹³Kiu inter vi estas saĝa kaj prudenta? tiu elmontru per honesta vivado siajn farojn en mildeco de saĝeco.

¹⁴Sed se vi havas akran ĵaluzon kaj malpacon en via koro, ne fieru, kaj ne mensogu kontraŭ la vero.

¹⁵Ĉi tiu saĝeco ne devenas de supre, sed estas monda, laŭsenta, demona.

¹⁶Ĉar kie estas ĵaluzo kaj malpaco, tie estas konfuzo kaj ĉia malnobla ago.

¹⁷Sed la saĝeco, kiu estas de supre, estas unue ĉasta, poste pacema, milda, cedema, plena de kompatemo kaj bonaj fruktoj, sen partieco, sen hipokriteco.

¹⁸Kaj la frukto de justeco estas semata en paco por tiuj, kiuj faras pacon.