Read La Sankta Biblio esparanto 1 Petro 5 Bible Online

1 Petro 5 - La Sankta Biblio esparanto bible

1 Petro 5

¹La presbiterojn do inter vi mi admonas, estante kunpresbitero kaj atestanto de la suferoj de Kristo kaj partoprenanto en la malkaŝota gloro:

²Paŝtu la gregon de Dio ĉe vi, direktante ĝin, ne devige, sed volonte, laŭ Dio; ne pro avideco, sed bonvole;

³ne kvazaŭ sinjorante super la heredo, sed fariĝante ekzemploj al la grego.

⁴Kaj kiam elmontriĝos la Ĉefpaŝtisto, vi ricevos la nevelkontan kronon de gloro.

⁵Tiel same, vi plijunuloj, submetu vin al la pliaĝuloj. Tial ankaŭ vi ĉiuj submetu vin unu al la alia, kaj zonu vin per humileco; ĉar Dio kontraŭstaras al la fieruloj, sed al la humiluloj donas gracon.

⁶Humiligu vin do sub la potencan manon de Dio, por ke Li altigu vin ĝustatempe;

⁷surĵetante sur Lin ĉian vian zorgon, ĉar Li zorgas pri vi.

⁸Estu sobraj, vigladu; via kontraŭulo, la diablo, kiel leono blekeganta ĉirkaŭiras, serĉante, kiun li povos forgluti;

⁹lin rezistu, konstantaj en la fido, sciante, ke la samaj suferoj plenumiĝas en via frataro en la mondo.

¹⁰Kaj la Dio de ĉia graco, kiu vin alvokis al Sia eterna gloro en Kristo, mem perfektigos, firmigos, plifortigos vin ne longe suferintajn.

¹¹Al Li estu la potenco por ĉiam kaj eterne. Amen.

¹²Per Silvano, la fidela frato, kiel mi opinias, al vi mi skribis mallonge, konsilante kaj atestante, ke ĉi tio estas la vera graco de Dio; en ĝi firme staru.

¹³Vin salutas la en Babel kunelektitino, kaj Marko, mia filo.

¹⁴Salutu unu la alian per ama kiso. Paco al vi ĉiuj, kiuj estas en Kristo.