Read La Sankta Biblio 1926 esparanto 1 Kroniko 11 Bible Online

1 Kroniko 11 - La Sankta Biblio 1926 esparanto bible

1 Kroniko 11

¹Kaj kunvenis ĉiuj Izraelidoj al David en Ĥebronon, kaj diris: Jen ni estas via osto kaj via karno.

²Ankaŭ hieraŭ kaj antaŭhieraŭ, kiam Saul estis ankoraŭ reĝo, vi elkondukadis kaj enkondukadis Izraelon; kaj la Eternulo, via Dio, diris al vi: Vi paŝtos Mian popolon Izrael, kaj vi estos estro de Mia popolo Izrael.

³Kaj ĉiuj plejaĝuloj de Izrael venis al la reĝo en Ĥebronon, kaj David faris kun ili interligon en Ĥebron antaŭ la Eternulo; kaj ili sanktoleis Davidon reĝo super Izrael, konforme al la vorto de la Eternulo per Samuel.

⁴Kaj David kaj ĉiuj Izraelidoj iris en Jerusalemon (tio estas, en Jebuson). Tie la Jebusidoj estis la loĝantoj de la lando.

⁵Kaj la loĝantoj de Jebus diris al David: Vi ne eniros ĉi tien. Sed David venkoprenis la fortikaĵon Cion, tio estas, la urbon de David.

⁶Kaj David diris: Kiu la unua venkobatos la Jebusidojn, tiu estos ĉefo kaj estro. Kaj la unua supreniris Joab, filo de Ceruja, kaj li fariĝis ĉefo.

⁷Kaj David ekloĝis en tiu fortikaĵo; pro tio oni donis al ĝi la nomon: Urbo de David.

⁸Kaj li ĉirkaŭkonstruis la urbon ĉiuflanke, de Milo en la tuta ĉirkaŭo; kaj Joab restarigis la ceterajn partojn de la urbo.

⁹Kaj David fariĝadis ĉiam pli kaj pli granda, kaj la Eternulo Cebaot estis kun li.

¹⁰Jen estas la ĉefaj herooj, kiuj estis ĉe David, kaj kiuj tenis sin forte kun li dum lia reĝado, kune kun la tuta Izrael, por reĝigi lin super Izrael konforme al la vorto de la Eternulo.

¹¹Jen estas la nombro de la herooj, kiuj estis ĉe David: Jaŝobeam, filo de Ĥaĥmoni, estro de la tridek; li levis sian lancon kontraŭ tricent kaj mortigis ilin per unu fojo.

¹²Post li estis Eleazar, filo de Dodo, la Aĥoĥido; li estis el la tri herooj.

¹³Li estis kun David en Pas-Damim, kie la Filiŝtoj kolektiĝis por batalo; tie estis kampoparto plena de hordeo; kaj la popolo forkuris antaŭ la Filiŝtoj.

¹⁴Sed tiuj stariĝis meze de la kampoparto, kaj savis ĝin kaj venkobatis la Filiŝtojn; kaj la Eternulo helpis per granda helpo.

¹⁵Kaj tri el la tridek ĉefoj iris sur la rokon al David, en la kavernon Adulam, dum la tendaro de la Filiŝtoj staris en la valo Refaim.

¹⁶David tiam estis en la fortikaĵo, kaj la garnizono de la Filiŝtoj estis tiam en Bet-Leĥem.

¹⁷Kaj David esprimis deziron kaj diris: Kiu trinkigus al mi akvon el la puto Bet-Leĥema, kiu estas apud la pordego?

¹⁸Tiam tiuj tri trarompe penetris en la tendaron de la Filiŝtoj, ĉerpis akvon el la puto Bet-Leĥema, kiu estis apud la pordego, prenis kaj alportis al David. Sed David ne volis trinki ĝin; li elverŝis ĝin al la Eternulo,

¹⁹kaj diris: Gardu min mia Dio, ke mi ne faru tion: ĉu mi trinku la sangon de tiuj viroj, kiuj riskis sian vivon? ĉar kun risko por sia vivo ili alportis ĝin. Kaj li ne volis trinki ĝin. Tion faris la tri herooj.

²⁰Abiŝaj, frato de Joab, estis estro de tiuj tri; li mortigis per sia lanco tricent homojn, kaj li havis gloran nomon inter la tri.

²¹El la tri li estis honorata de du kaj estis ilia estro, sed en la trion li ne eniris.

²²Benaja, filo de Jehojada, filo de homo kuraĝa, granda pro siaj faroj, el Kabceel: li mortigis la du fortulojn de Moab; li ankaŭ malsupreniris, kaj mortigis leonon en kavo en neĝa tago.

²³Li ankaŭ mortigis Egipton, viron, kiu havis la alton de kvin ulnoj; en la mano de la Egipto estis lanco kiel rultrabo de teksisto; li aliris al li kun bastono, elŝiris la lancon el la mano de la Egipto, kaj mortigis lin per lia propra lanco.

²⁴Tion faris Benaja, filo de Jehojada. Kaj li havis gloran nomon inter la tri herooj.

²⁵Inter la tridek li estis plej honorata, sed en la trion li ne eniris. Kaj David faris lin lia korpogardistestro.

²⁶La ĉefaj militistoj estis: Asahel, frato de Joab, Elĥanan, filo de Dodo, el Bet-Leĥem,

²⁷Ŝamot, la Harorano, Ĥelec, la Pelonano,

²⁸Ira, filo de Ikeŝ, la Tekoaano, Abiezer, la Anatotano,

²⁹Sibĥaj, la Ĥuŝaido, Ilaj, la Aĥoĥido,

³⁰Maharaj, la Netofaano, Ĥeled, filo de Baana, la Netofaano,

³¹Itaj, filo de Ribaj, el Gibea de la Benjamenidoj, Benaja, la Piratonano,

³²Ĥuraj, el Naĥale-Gaaŝ, Abiel, la Arbatano,

³³Azmavet, la Baĥurimano, Eljaĥba, la Ŝaalbonano;

³⁴el la filoj de Haŝem, la Gizonano: Jonatan, filo de Ŝage, la Hararano,

³⁵Aĥiam, filo de Saĥar, la Hararano, Elifal, filo de Ur,

³⁶Ĥefer, la Meĥeratano, Aĥija, la Pelonano,

³⁷Ĥecro, la Karmelano, Naaraj, filo de Ezbaj,

³⁸Joel, frato de Natan, Mibĥar, filo de Hagri,

³⁹Celek, la Amonido, Naĥaraj, la Beerotano, armilportisto de Joab, filo de Ceruja,

⁴⁰Ira, la Jetrido, Gareb, la Jetrido,

⁴¹Urija, la Ĥetido, Zabad, filo de Aĥlaj,

⁴²Adina, filo de Ŝiza, la Rubenido, ĉefo de Rubenidoj, kaj kun li estis tridek,

⁴³Ĥanan, filo de Maaĥa, Joŝafat, la Mitnido,

⁴⁴Uzija, la Aŝterotano, Ŝama kaj Jeiel, filoj de Ĥotam, la Aroerano,

⁴⁵Jediael, filo de Ŝimri, kaj lia frato Joĥa, la Ticano,

⁴⁶Eliel, la Maĥavido, Jeribaj kaj Joŝavja, filoj de Elnaam, Jitma, la Moabido,

⁴⁷Eliel, Obed, kaj Jaasiel el Mecobaja.