Read La Sankta Biblio 1926 esparanto Ijob 11 Bible Online

Ijob 11 - La Sankta Biblio 1926 esparanto bible

Ijob 11

¹Kaj ekparolis Cofar, la Naamano, kaj diris:

²Ĉu kontraŭ multe da vortoj oni ne povas doni respondon? Kaj ĉu tiu, kiu multe parolas, estas prava?

³Ĉu via senenhava parolado devas silentigi la homojn, Por ke vi mokinsultu kaj neniu vin hontigu?

⁴Vi diras: Mia opinio estas ĝusta, Kaj mi estas pura antaŭ Viaj okuloj.

⁵Sed ho, se Dio ekparolus, Kaj malfermus antaŭ vi Siajn lipojn,

⁶Kaj malkaŝus antaŭ vi la sekretojn de la saĝo, Kiu havas multoblan forton! Sciu, ke ne ĉiujn viajn pekojn Dio rememoras.

⁷Ĉu vi povas eltrovi la esencon de Dio? Ĉu vi povas plene kompreni la perfektecon de la Plejpotenculo?

⁸Tio estas pli alta ol la ĉielo; Kion vi povas fari? Tio estas pli profunda ol Ŝeol; Kion vi povas ekscii?

⁹Pli longa ol la tero estas ĝia mezuro, Kaj pli larĝa ol la maro.

¹⁰Se Li preteriros, kaj fermos, kaj faros juĝon, Tiam kiu repuŝos Lin?

¹¹Ĉar Li konas la homojn malvirtajn; Li vidas la malbonagojn, kiujn oni ne rimarkas.

¹²Eĉ vanta homo devas kompreni, Eĉ homo, kiu naskiĝis sovaĝulo.

¹³Se vi aranĝas vian koron Kaj etendas al Li viajn manojn;

¹⁴Se vi forigas la malvirton, kiu estas en via mano, Kaj vi ne permesos al malbonaĵoj resti en via tendo:

¹⁵Tiam vi povos levi vian vizaĝon sen difekto; Vi estos firma kaj ne timos.

¹⁶Tiam vi forgesos mizeron; Vi rememoros ĝin kiel forfluintan akvon.

¹⁷Kaj via vivo leviĝos pli hele ol la tagmezo, La mallumo fariĝos kiel mateno.

¹⁸Kaj vi estos trankvila, ĉar ekzistas espero; Vi rigardos ĉirkaŭen, kaj iros dormi en sendanĝereco.

¹⁹Vi kuŝos, kaj neniu vin timigos; Kaj multaj serĉos vian favoron.

²⁰Sed la okuloj de malpiuloj konsumiĝos, Pereos por ili la rifuĝo, Kaj ilia espero elspiros sian vivon.