Read La Sankta Biblio 1926 esparanto Ijob 13 Bible Online

Ijob 13 - La Sankta Biblio 1926 esparanto bible

Ijob 13

¹Ĉion ĉi tion mia okulo vidis, Mia orelo aŭdis kaj komprenis.

²Kion vi scias, mi ankaŭ scias; Kaj mi ne estas malpli valora ol vi.

³Sed mi volus paroli kun la Plejpotenculo, Mi dezirus disputi kun Dio.

⁴Tamen vi komentarias malvere, Vi ĉiuj estas senutilaj kuracistoj.

⁵Ho, se vi silentus, Tio estus saĝeco de via flanko.

⁶Aŭskultu do mian moralinstruon, Kaj atentu la defendan parolon de mia buŝo.

⁷Ĉu pro Dio vi volas paroli malveron, Kaj pro Li paroli falsaĵon?

⁸Ĉu vi volas esti personfavoraj al Li, Aŭ pro Dio vi volas disputi?

⁹Ĉu estos bone, kiam Li esploros vin? Ĉu vi volas trompi Lin, kiel oni trompas homon?

¹⁰Li certe vin punos, Se vi sekrete estos personfavoraj.

¹¹Ĉu Lia majesto ne konfuzas vin? Ĉu ne falas sur vin timo antaŭ Li?

¹²Viaj memorigoj estas sentencoj polvaj, Via bastionoj estas amasoj da argilo.

¹³Silentu antaŭ mi, kaj parolos mi, Kio ajn trafos min.

¹⁴Por kio mi portu mian karnon en miaj dentoj Kaj metu mian animon en mian manon?

¹⁵Li ja mortigos min, kaj mi ne havas esperon; Sed pri mia konduto mi volas disputi antaŭ Li.

¹⁶Tio jam estos savo por mi, Ĉar ne hipokritulo venos antaŭ Lin.

¹⁷Aŭskultu mian parolon Kaj mian klarigon antaŭ viaj oreloj.

¹⁸Jen mi pretigis juĝan aferon; Mi scias, ke mi montriĝos prava.

¹⁹Kiu povas procesi kontraŭ mi? Tiam mi eksilentus kaj mortus.

²⁰Nur du aferojn ne faru al mi, Tiam mi ne kaŝos min antaŭ Via vizaĝo:

²¹Malproksimigu de mi Vian manon, Kaj Via teruro ne timigu min.

²²Tiam voku, kaj mi respondos; Aŭ mi parolos, kaj Vi respondu al mi.

²³Kiom da malbonagoj kaj pekoj estas sur mi? Sciigu al mi miajn krimojn kaj pekojn.

²⁴Kial Vi kaŝas Vian vizaĝon Kaj rigardas min kiel Vian malamikon?

²⁵Ĉu Vi volas montri Vian forton kontraŭ deŝirita folio? Kaj ĉu sekiĝintan pajleron Vi volas persekuti?

²⁶Ĉar Vi skribas kontraŭ mi maldolĉaĵon Kaj venigas sur min la pekojn de mia juneco.

²⁷Vi metis miajn piedojn en ŝtipon, Vi observas ĉiujn miajn vojojn, Kaj Vi observas la plandojn de miaj piedoj;

²⁸Dum mi ja disfalas kiel putraĵo, Kiel vesto dismanĝita de tineoj.