Read La Sankta Biblio 1926 esparanto Ijob 16 Bible Online

Ijob 16 - La Sankta Biblio 1926 esparanto bible

Ijob 16

¹Ijob respondis kaj diris:

²Mi aŭdis multe da similaj aferoj; Tedaj konsolantoj vi ĉiuj estas.

³Ĉu estos fino al la ventaj vortoj? Kaj kio vin incitis, ke vi tiel parolas?

⁴Mi ankaŭ povus paroli, kiel vi. Se vi estus sur mia loko, Mi konsolus vin per vortoj Kaj balancus pri vi mian kapon.

⁵Mi fortigus vin per mia buŝo Kaj konsolus vin per paroloj de miaj lipoj.

⁶Se mi parolos, mia doloro ne kvietiĝos; Se mi ĉesos, kio foriros de mi?

⁷Sed nun Li lacigis min, Li detruis mian tutan esencon.

⁸Vi faris al mi sulkojn, tio fariĝis atesto; Mia senfortiĝo staras antaŭ mia vizaĝo, kaj parolas.

⁹Lia kolero disŝiras; Mia malamanto grincigas kontraŭ mi siajn dentojn; Mia premanto briligas kontraŭ mi siajn okulojn.

¹⁰Ili malfermegis kontraŭ mi sian buŝon, insulte batas min sur la vangojn; Ĉiuj kune kontentigis sur mi sian koleron.

¹¹Dio transdonis min al maljustulo, Ĵetis min en la manojn de malbonuloj.

¹²Mi estis trankvila; sed Li frakasis min, Li kaptis min je la kolo, disbatis min, Kaj Li faris min por Si celo.

¹³Liaj pafistoj min ĉirkaŭis; Li dishakas miajn internaĵojn kaj ne kompatas, Li elverŝas sur la teron mian galon.

¹⁴Li faras en mi breĉon post breĉo, Li kuras kontraŭ min kiel batalisto.

¹⁵Sakaĵon mi kudris sur mian korpon, Kaj en polvo mi kaŝis mian kornon.

¹⁶Mia vizaĝo ŝvelis de plorado, Kaj sur miaj palpebroj estas morta ombro;

¹⁷Kvankam ne troviĝas perfortaĵo en miaj manoj, Kaj mia preĝo estas pura.

¹⁸Ho tero, ne kovru mian sangon, Kaj mia kriado ne trovu haltejon.

¹⁹Vidu, en la ĉielo estas mia atestanto, Kaj mia konanto estas en la altaj sferoj.

²⁰Parolistoj estas por mi miaj amikoj; Sed mia okulo larmas al Dio,

²¹Ke Li decidu inter homo kaj Dio, Inter homo kaj lia amiko.

²²Ĉar la nombro de la jaroj pasos, Kaj mi iros sur vojon nereveneblan.