Read La Sankta Biblio 1926 esparanto Ijob 19 Bible Online

Ijob 19 - La Sankta Biblio 1926 esparanto bible

Ijob 19

¹Ijob respondis kaj diris:

²Ĝis kiam vi afliktados mian animon Kaj turmentados min per paroloj?

³Jen jam dek fojojn vi malhonoras min; Vi ne hontas premi min.

⁴Se mi efektive eraris, Mia eraro restos ĉe mi.

⁵Se efektive vi volas montri vin pli grandaj ol mi, Kaj vi riproĉas al mi hontindaĵon,

⁶Tiam sciu, ke Dio faris al mi maljustaĵon, Kaj ĉirkaŭis min per Sia reto.

⁷Jen mi krias pri maljusteco, sed mi ne ricevas respondon; Mi vokas, sed mi ne ricevas juĝon.

⁸Mian vojon Li baris, ke mi ne povas transiri, Kaj sur mian irejon Li metis mallumon.

⁹Mian honoron Li detiris de mi, Kaj deprenis la kronon de mia kapo.

¹⁰Li disbatis min ĉirkaŭe tiel, ke mi pereas; Mian esperon Li elŝiris kiel arbon.

¹¹Ekflamis kontraŭ mi Lia kolero, Kaj Li rigardas min kiel Lian malamikon.

¹²Kune venis Liaj taĉmentoj, kaj ebenigis kontraŭ mi sian vojon Kaj stariĝis sieĝe ĉirkaŭ mia tendo.

¹³Miajn fratojn Li malproksimigis de mi, Kaj miaj konatoj forfremdiĝis de mi.

¹⁴Miaj parencoj fortiriĝis, Kaj miaj konantoj forgesis min.

¹⁵La loĝantoj de mia domo kaj miaj servistinoj rigardas min kiel fremdulon; En iliaj okuloj mi fariĝis aligentulo.

¹⁶Mian sklavon mi vokas, kaj li ne respondas; Per mia buŝo mi devas petegi lin.

¹⁷Mia spiro fariĝis abomenata por mia edzino, Kaj mia petado por la filoj de mia ventro.

¹⁸Eĉ la malgrandaj infanoj malestimas min; Kiam mi leviĝas, ili parolas kontraŭ mi.

¹⁹Abomenas min ĉiuj miaj intimuloj; Kaj tiuj, kiujn mi amis, turnis sin kontraŭ mi.

²⁰Kun mia haŭto kaj kun mia karno kunkreskis miaj ostoj, Mi restis nur kun haŭto sur miaj dentoj.

²¹Kompatu min, kompatu min, miaj amikoj; Ĉar la mano de Dio frapis min.

²²Kial vi persekutas min, kiel Dio, Kaj ne povas satiĝi de mia karno?

²³Ho, se miaj vortoj estus enskribitaj, Ho, se ili estus gravuritaj en libro,

²⁴Per fera skribilo kun plumbo, Gravuritaj por eterne sur roko!

²⁵Sed mi scias, ke mia Liberigonto vivas, Kaj fine Li leviĝos super la polvo.

²⁶Kaj post kiam mia haŭto estos tiel detruita Kaj mi estos senkorpa, mi vidos Dion;

²⁷Lin vidos mi, kaj miaj okuloj vidos, ne fremdaj; Pri tio sopiregas mia interno en mia brusto.

²⁸Se vi diros: Kiel ni lin persekutu, Kaj ni trovu kontraŭ li la radikon de la afero,

²⁹Tiam timu glavon; Ĉar furioza estas la glavo kontraŭ malbonagoj, Por ke vi sciu, ke ekzistas juĝo.